Արցախի նախագահի գլխավորած պատվիրակությունն արդեն Երևանում է: Այս մասին հայտնում է MediaHub-ի աղբյուրը:
Հիշեցնենք, շաբաթ օրը Ստեփանակերտի Վերծննդի հրապարակում ինքնաբուխ հանրահավաք անցկացվեց: Մասնակիցները ուշ երեկոյան շրջափակեցին նախագահի նստավայրի մուտքը և պահանջեցին, որպեսզի Արայիկ Հարությունյանն իջնի ու անձամբ նրանց պատասխանի, թե ի՞նչ է կատարվում Արցախի շուրջ: Հավաքի մասնակիցներն անհանգստացած էին Պրահայում Ալիևի և Էրդողանի հետ Փաշինյանի հանդիպումներից ու ձեռք բերված պայմանավորվածություններից:
Այդ օրը հայտնի դարձավ, որ Արայիկ Հարությունյանն աշխատանքային այցով կմեկնի Երևան՝ ՀՀ իշխանությունների հետ քննարկումների համար: Սակայն դրանից հետո որևէ նորություն, թե ո՞ւր է հասել արցախյան պատվիրակությունը չկա:
Ավելին՝ նախօրեին հայտնի դարձավ, որ Փաշինյանի գլխավորությամբ տեղի է ունեցել Անվտանգության խորհրդի նիստ, որին ներկա է գտնվել նաև ՀՀ նախագահ Վահագն Խաչատուրյանը: Շատերի մոտ հարց առաջացավ՝ ինչո՞ւ է Փաշինյանը ԱԽ նիստ հրավիրել, քաջ տեղեկացված լինելով, որ Արցախի պատվիրակությունը՝ նախագահի գլխավորությամբ, շտապում է Երևան: Մյուս կողմից, գուցե այսպես Փաշինյանը մեսիջ էր հղում Արայիկ Հարությունյանին, որ նրան չեն սպասում Երևանո՞ւմ:
Ինչևէ, մեր աղբյուրը հայտնեց՝ պատվիրակությունն արդեն Երևանում է:
MediaHub-ի հետ զրույցում Արցախի նախագահի խոսնակ Լուսինե Ավանեսյանը նշեց, թե այս պահին որևէ նորություն չի կարող հայտնել: Մասնավորապես, հարցրել էինք պատվիրակությունն արդեն Երևանո՞ւմ է և արդյոք տեղի է ունենալու Նիկոլ Փաշինյանի հետ հանդիպում:
Սպասենք օրվա զարգացումներին: