ԱՄՆ ակադեմիական շրջանակների գիտնականներից մեկը Նիկոլ Փաշինյանին անվանել է «ընտրված բռնապետ»:
Ինչքան էլ պարադոքսալ հնչի այս ձևակերպումն՝ այն միանգամայն իրական ձևով տալիս է Հայաստանի գործող իշխանության քաղաքական էպիկրիզը:

Ֆորմալ առումով՝ Հայաստանում ընտրություններն օրինական են: Համենայնդեպս, 2018-ին ու 2021-ին իշխանությունները նման ընտրությունների միջոցով են ձևավորվել, ինչը Փաշինյանին հիմք է տվել պնդելու, որ նա օրինական վարչապետ է:

Իրավական հարթության վրա Փաշինյանը ճիշտ է, բայց այդ ընտրություններում բացակայել է մրցակցային բաղադրիչը, որովհետև Հայաստանի իշխանությունն ընտրվել, ապա վերարտադրվել է հասարակության ռասիստական «գունաբաժանման» միջոցով՝ «սև» հռչակելով իր բոլոր մրցակիցներին, անգամ նրանց, որ քաղաքական կամ ինստիտուցիոնալ կապ չունեն հին համակարգի հետ:

Ժողովրդավարության քննության կարևոր թեստ է համարվում այն հանգամանքը, երբ ընդդիմությունը կարողանում է իշխանության գալ ընտրությունների ճանապարհով: Հեղափոխություններից հետո նման բան եղել է Վրաստանում՝ առնվազն մեկ անգամ, Ուկրաինայում՝ երկու անգամ: Մարդիկ չեն հավատում, որ Հայաստանում նման բան հնարավոր է, չեն հավատում, որ Փաշինյանն ինքնակամ կարող է հեռանալ իշխանությունից, եթե անգամ պարտվի ընտրություններում:

Արդեն կան նախանշաններն, որ Փաշինյանը որոշել է «խմբագրել» ընտրությունների ինստիտուտը՝ ԿՀԸ գործուղելով մի մարդու, որն ամբողջ կյանքում կատարել է բացառապես իր հանձնարարությունները:
Փաշինյանն ակնհայտորեն չի հաշտվում նաև այն փաստի հետ, երբ իր թիմից դուրս որևէ մեկը հաղթում է խոշոր որևէ համայնքի ՏԻՄ ընտրություններում:

Օրինակ, Մամիկոն Ասլանյանը «5 րոպե պակաս» ռեժիմով Վանաձորի քաղաքապետ էր, երբ իշխանությունները նրան կալսնավորեցին:

Կամ Բերդ համայնքի վերընտրված համայնքապետ Հարություն Մանուչարյանը, ով հարում է ընդդիմությանը, ազատության մեջ հայտնվեց միայն այն բանից հետո, երբ հրաժարվեց պաշտոնից:

Զուգահեռ տեղի է ունենում դատական համակարգի գռեհիկ «կապիտուլյացիա» գործադիր իշխանության առջև: Այդ «առաքելությունը» կատարելու է Կարեն Անդրեասյանը, ով միայն ձևական է հրաժարվել ՔՊ անդամությունից, որովհետև մինչև ԲԴԽ նախագահ դառնալը, հավակնում էր կառավարող կուսակցության ղեկավար մարմնի անդամի կարգավիճակին:

Թեկուզև «ընտրված բռնապետերը» փոխվում են փողոցի միջոցով: Փաշինյանը, որի վարկանիշային անկումն ակնհայտ է, այլ ընտրություն Հայաստանի հասարակությանը չի թողել:

Վահրամ Բագրատյան