Մենք ինքնախաբեությունների արդյունքում ենք այս օրին հասել։ Ռազմական սպառնալիքի նկատմամբ ոչ պատշաճ արձագանքի արդյունքում ենք այս օրին հասել։ Բացթողումների մասին չեմ խոսի, քանի որ 24 ժամն էլ չի հերիքի։ Այս մասին այսօր MediaHub.am-ի հետ զրույցում ասաց ՀՀ նախկին փոխոստիկանապետ Հովհաննես Քոչարյանը՝ խոսելով երկրում տիրող իրավիճակի մասին։
«Ես կարծում եմ, որ մեր անվտանգային համակարգը սխալ ենք կառուցել՝ թե՛ ներքին, թե՛ արտաքին։ Եվ այս սխալների պատճառով այսօր մենք կանգնել ենք նման լրջագույն ռիսկերի առաջ, մեր պետականությունը լուրջ սպառնալիքների առաջ է։ Հուսամ՝ դեռ ժամանակ ունենք այդ սխալներն ուղղելու ու մեզ համար ավելի կործանանար քայլերի չգնալու համար։ Երկրի անվտանգությունը պետք է թողնենք պրոֆեսիոնալիներին»,-ասաց նա։
Ճշտող հարցին, թե ովքե՞ր են այդ պրոֆեսիոնալները՝ վերջինս արձագանքեց՝ ներկա և նախորդ իշխանություններին տարանջատել պետք չէ։
«Բոլորն էլ ունեն իրենց ձեռքբերումներն ու ձախողումները, ես հավաքական եմ նայում այս ամենին ու համարում եմ, որ պետք է առաջ նայել։ Իշխանությունը մեկ միասնական օրգանիզմ է՝ անկախ նրանից, թե ով է այդ պահին ղեկն իր ձեռքը վերցնում, պատասխանատվության շրջանակը դրանից չի փոխվում։ Պրոֆեսիոնալներ միշտ կան, այդ կադրերին գտնելու մեխանիզմներ են պետք»։
Անդրադառնալով այսօր ոստիկանության գործողություններին, նախկին փոխոստիկանապետը շեշտեց՝ ոստիկանությունը և՛ իշխանության խնդիրներն է լուծում, և՛ հասարակության, սակայն այդ չափաբաժինը ժամանակ առ ժամանակ փոփոխվում է.
«Եթե վերջին շրջանի գործողությունները վերլուծենք, ապա ինձ համար նույնպես տարակուսանք է առաջացնում ոստիկանության կատարածը և լավ է, որ այս իշխանության ներսից էլ են քննադատություններ հնչում. սա ինձ համար նորություն էր, որ իշխանության ներսից ոստիկանության գործողությունները քննադատվում են։ Իրականում, այդքան էլ չեմ հասկանում, թե ոստիկանության ներսում ինչ է կատարվում։ Տեսեք, միևնույն ստորաբաժանման ներսում տարբեր հրամանատարների ծառայության օրոք տարբեր գործելակերպ է օրդեգրվում, որն ինչ համար նորություն է։ Չեմ հասկանում, թե կառավարման ինչ փոփոխություն է, սրա լուծումը և կառավարչական մեխանիզմը դեռ չեմ գտել»,-ասաց նա։ Դիտարկմանը, որ գուցե ոստիկանապետերի փոփոխություներով է պայմանավորված, որ գերատեսչությունում ձեռագիրը հաճախ է փոփոխվում՝ Քոչարյանն արձագանքեց․
«Այո, ձեռագրի փոփոխություն կա, ակնհայտ է, բայց պետք է հրաժարվել այդ գործելաոճից, դա բորբոքում է հասարակությանը, ավելի անհանդուրժող է դարձնում մարդկանց, պառակտում է։ Ոստիկանությունը պետք է զգա հասարակությանը, ուժի կիրառումը միայն իրավաբանական գործընթաց չէ, դա նաև տրամաբանական, հոգեբանական գործընթաց է, սպաները սա պետք է հաշվի առնեն: Գործում են այնպես, ինչպես կգործեր միջին վիճակագրական հրամանատարը, բայց մեր երկրում իրավիճակ է փոխվել, չէ՞»,-ամփոփեց նա։
Լիաննա Թորոսյան