ԱԺ «Հայաստան» խմբակցության պատգամավորներ Արամ Վարդեւանյանի, Վահե Հակոբյանի, Հռիփսիմե Ստամբուլյանի, Ելենա Կիրակոսյանի մանդատները վայր դնելն ու խորհրդարանից հեռանալը նոր հորիզոններ է բացում «Հայաստան» դաշինքի նախընտրական ցուցակի այլ անդամների համար։

«Հայաստան» դաշինքի ցուցակով խորհրդարան մտնող հաջորդ թեկնածուներն են՝ Ռիմա Ղազարյան, Ռուբեն Մելքոնյան, Մհեր Սահակյան, Մարիա Պետրոսյան։

Ռուբեն Մելքոնյանն այս պահին զբաղեցնում է Երեւանի պետական համալսարանի արեւելագիտության ֆակուլետի դեկանի պաշտոնը։ MediaHub-ը Մելքոնյանից հետաքրքրվեց՝ ո՞րը կնախընտրի արեւելագետը՝ դեկանի պաշտոնը, թե՞ ԱԺ պատգամավորական աթոռը։ Վերջինս ասաց, որ որոշման մասին ստույգ կհայտարարի 2 օր անց։

«Քանի որ դեռ իրավական ամրագրումը չկա, եւ ԿԸՀ-ից դեռ պաշտոնապես իմ հերթը չի եկել, չի ներկայացվել, այս պահին կխուսափեմ որեւէ հայտարարություն անել։ Երբ որ իրավական առումով հերթը հասնի ինձ՝ հանդես կգամ հրապարակային հայտարարությամբ՝ հիմնավորելով իմ քայլը, անկախ նրանից թե, որը կլինի այն՝ վերցնելը, թե չվերցնելը»,-նշեց նա։

Դիտարկմանը, թե նախկինում ցանկություն կար պատգամավոր դառնալու, հիմա տարակուսո՞ւմ է, ասաց․ «Երբեւէ չեմ հայտարարել, որ ուզում եմ վերցնել մանդատը, ասել եմ, որ պատրաստ եմ պայքարել ու որ պաշտոնն ինձ համար մեծ նշանակություն չի ունեցել։ Ես զբաղեցնում եմ արեւելագետի համար ամենաբարձր պաշտոնը»,-հավելեց նա

Հիշեցնենք, որ ԱԺ «Հայաստան» խմբակցությունում մանդատները վայր դնելու մասին հայտարարությամբ են հանդես եկել ֆրակցիայից 4 պատգամավոր՝ Արամ Վարդեւանյանը, Վահե Հակոբյանը, Ելենա Կիրակոսյանը եւ Հռիփսիմե Ստամբուլյանը։

Ավելի վաղ Վահե Հակոբյանը MediaHub-ի հետ զրույցում ասել էր, որ Ազգային ժողովից հեռանալու պատճառներից մեկն այն է, որ չեն կիսում «Հայաստան» դաշինքի գործընկերների՝ խորհրդարան վերադառնալու որոշումը։

«Ամենակարեւորը պետք է ֆիքսել, որ մեր այս որոշումը «Հայաստան» խմբակցության ներսում որեւէ գլոբալ խնդրի կամ հակադրման հետեւանք չէ։ Բանն այն է, որ մենք չենք կիսում «Հայաստան» խմբակցության մեր գործընկերների խորհրդարան վերադառնալու եւ բնականոն աշխատանքները շարունակելու որոշումը, մեզ համար դա անընդունելի է»,-ասել էր Հակոբյանը։

Նա կարծում է, որ ԱԺ նիստերի բոյկոտը շարունակելով՝ ընդդիմադիրները կարող էին հասնել քաղաքական ճգնաժամի, ինչի մասին բազմիցս խոսվել է։

Լիա Սարգսյան