Մեր Ազգային ժողովից հեռանալու պատճառներից մեկն այն է, որ չենք կիսում «Հայաստան» դաշինքի մեր գործընկերների՝ խորհրդարան վերադառնալու որոշումը․ MediaHubi—ի հետ զրույցում այս մասին ասաց ԱԺ «Հայաստան» խմբակցության անդամ, «Վերածնվող Հայաստան» կուսակցության ղեկավար Վահե Հակոբյանը՝ մեկնաբանելով մանդատները վայր դնելու կուսակցականների որոշումը։
Քիչ առաջ հայտնի դարձավ, որ ԱԺ «Հայաստան» խմբակցության «Վերածնվող Հայաստան» կուսակցության անդամներ Վահե Հակոբյանը, Հռիփսիմե Ստամբուլյանը եւ Ելենա Կիրակոսյանը վայր են դնում մանդատներն ու հեռանում խոհրդրարանից։
«Ամենակարեւորը պետք է ֆիքսել, որ մեր այս որոշումը «Հայաստան» խմբակցության ներսում որեւէ գլոբալ խնդրի կամ հակադրման հետեւանք չէ։ Բանն այն է, որ մենք չենք կիսում «Հայաստան» խմբակցության մեր գործընկերների խորհրդարան վերադառնալու եւ բնականոն աշխատանքները շարունակելու որոշումը, մեզ համար դա անընդունելի է»,-մեզ հետ զրույցում ասաց Հակոբյանը։
Նա կարծում է, որ ԱԺ նիստերի բոյկոտը շարունակելով՝ ընդդիմադիրները կարող էին հասնել քաղաքական ճգնաժամի, ինչի մասին բազմիցս խոսվել է։
«Դա էր մեր գլխավոր նպատակը։ Իհարկե, պետք է նաեւ ֆիքսենք, որ մենք չենք ընդգծում, թե որն է բացարձակ ճշմարտություն՝ ԱԺ վերադառնալը, թե՞ չվերադառնալը։ Ժամանակը ցույց կտա՝ որն էր ճիշտը»,-ասաց նա։
ՀՀ երկրորդ նախագահ Ռոբերտ Քոչարյանի հետ, ասում է, որեւէ տարաձայնություններ չունի, արձագանքը՝ «բացարձակ չկա», թեպետ մամուլն այլ բան է գրում։ Խորհրդարանի խոսնակ Ալեն Սիմոնյանը դեռեւս շաբաթներ առաջ էր ասել, թե իր տեղեկություններով՝ կազմաքանդվում է «Հայաստան» խմբակցությունը։ Վահե Հակոբյանի խոսքով, կազմաքանդում կլիներ այն դեպքում, երբ մանդատները վայր չդնելով՝ դուրս գային խմբակցությունից։
«Երբ խորհրդարանում դառնայինք առանձին քաղաքական ուժ, կամ անհատ, այդ ժամանակ կարող էիք ասել, որ կազմաքանդվում է ֆրակցիան։ Կրկնում եմ, որեւէ գլոբալ, գաղափարային տարաձայնություններ չունենք»,- շեշտեց նա։
Հետաքրքրվեցինք նաեւ՝ կմասնակցե՞ն «Հայաստան» դաշինքի՝ խորհրդանից դուրս կազմակերպվող բողոքի ակցիաներին ու հանրահավաքներին, ինչպես նախկինում, երբ մի թիմի անդամ էին։ «Այն ֆորմատը, որը մեզ համար կլինի ընդունելի, կսատարենք, կկանգնենք նրանց կողքին, ընդ որում ոչ միայն «Հայաստան» դաշինքի, այլ ցանկացած առողջ ուժերի»,- հավելեց Հակոբյանը։
Լիա Սարգսյան