MediaHub-ի տեղեկություններով, գիշերը խաղաղ չի եղել Երևանի մետրոպոլիտենում:

Ըստ մեր աղբյուրի, շուրջ ինը տասնյակ մեքենավարներ որոշում էին կայացրել այսօր առավոտյան գործադուլ հայտարարել՝ աշխատավարձերի բարձրացման պահանջով: Ամբողջ գիշեր, գրեթե մինչև ժամը 4-ը, Երևանի քաղաքապետ Հրաչյա Սարգսյանը բանակցել է մետրոպոլիտենի  մեքենավարների հետ, որպեսզի մետրոպոլիտենի աշխատանքը չխաթարվի:

Մեզ փոխանցեցին, որ որոշակի պայմանավորվածություններ են ձեռք բերվել կողմերի միջև, որի շնորհիվ այսօր առավոտյան մեքենավարները դուրս են եկել աշխատանքի և երևանյան մետրոն չի դադարեցրել գործունեությունը:

Հիշեցնենք, որ վերջին ամիսներին սա առաջին դեպքը չի, երբ մետրոյի աշխատակիցները բարձրաձայնում են իրենց դժգոհությունը աշխատանքի և աշխատավարձի անհամապատասխանության մասով: Այդպես, հուլիսի 27-ին էր մետրոյի աշխատանքը կաթվածահար եղել, բայց դարձյալ աշխատակիցներին որոշակի խոստումներ տրվեցին:

Նշենք, որ տեղեկությունը ճշտելու համար MediaHub-ը փորձեց կապ հաստատել Մետրոպոլիտենի լրատվական բաժնի հետ, բայց մեր զանգերը մնացին անպատասխան։