«Եթե հիմա ցանկանանք գնալ Ներքին Սուս, այլևս թույլ չեն տա մտնել, բայց չգիտեմ ադրբեջանական վերահսկողության տակ է անցել, թե ոչ։ Այս մասին MediaHub.am-ի հետ զրույցում ասաց Արցախի Քաշաթաղի շրջանի Ներքին Սուս համայնքի ղեկավար Մխիթար Ներսիսյանը՝ անդրադառնալով Ադրբեջանի նախագահ Իլհամ Ալիևի հայտարարությանը, թե Լաչինը, Աղավնոն և Սուսն անցել են իրենց վերահսկողության տակ:
«Լաչինի միջանցքում դեռ ռուս խաղաղապահներն են տեղակայված։ Բայց բնակավայրերում այլևս մարդիկ չկան, բոլորը դուրս են եկել, չգիտեմ ադրբեջանցիները մտել են համայնքներ, թե ոչ, հիմա Արցախում չեմ»,-ասաց համայնքի ղեկավարը։
Հիշեցնենք, որ Արցախի Հանրապետության տարածքային կառավարման և ենթակառուցվածքների նախարար Հայկ Խանումյանը նշել էր, որ Բերձորի միջանցքի նոր երթուղին կգործարկվի ընթացիկ տարվա սեպտեմբերի առաջին շաբաթվա ընթացքում, մինչ այդ կգործի Ստեփանակերտ-Բերձոր-Գորիս մայրուղին: Այսպիսով նա հաստատել էր MediaHub-ի ավելի վաղ հրապարակած տեղեկությունները:
Այլընտրանքային երթուղին կգործի դեպի հարավ տեղափոխվող նոր միջանցքում: Նոր ճանապարհով երթևեկությունը կսկսվի ռուսական խաղաղապահ զորակազմի բոլոր բլոկ-պոստերի տեղակայումից հետո: Միջանցքում գտնվող 3 համայնքների վերաբերյալ որևէ հայտարարություն չի արվել։
Անի Գևորգյան