Իրանի միջուկային ծրագիրը զգալի վնաս է կրել ԱՄՆ-ի հարվածների հետևանքով, հայտարարել է ԱՄՆ Կենտրոնական հետախուզական գործակալության տնօրեն Ջոն Ռետկլիֆը՝ հղում անելով նոր հետախուզական տվյալների։
«ԿՀԳ-ն կարող է հաստատել, որ հավաստի հետախուզական տվյալների կուտակային մասը ցույց է տալիս, որ Իրանի միջուկային ծրագիրը զգալի վնաս է կրել վերջին թիրախային հարվածների հետևանքով», - ասվում է հայտարարության մեջ։
Հատուկ ծառայության ղեկավարը նշել է, որ հավաստի աղբյուրներից ստացվել են նոր հետախուզական տվյալներ, որ Իրանի մի քանի կարևոր միջուկային օբյեկտներ ոչնչացվել են, և դրանց վերականգնման համար տարիներ կպահանջվեն։
Ռետկլիֆը հավելել է, որ կառույցը շարունակում է լրացուցիչ տեղեկություններ հավաքել և շարունակելու է տեղեկացնել պաշտոնյաներին և հանրությանը։