Կառավարությունը շտապում է. Հայրապետյանի հրաժարականը հաստատվեց, ո՞վ կփոխարինի նրան
Ինչպես այսօր ավելի վաղ տեղեկացրել էինք՝ Սննդամթերքի անվտանգության տեսչական մարմնի ղեկավար Արմեն Հայրապետյանը հրաժարականի դիմում է ներկայացրել: Լուրը MediaHub-ի հետ զրույցում հաստատել էին ՍԱՏՄ-ից:
Մենք գրել էինք, որ ըստ ընթացակարգի՝ հրաժարականը պետք է հաստատվի կառավարման խորհրդի նիստում: Ի սկզբանե նիստը պետք է տեղի ունենար նոյեմբերի 7-ին, սակայն այն տեղափոխվել էր նոյեմբերի 8-ին:
Սակայն MediaHub-ին նոր հայտնի դարձավ, որ նիստը տեղի է ունեցել օնլայն ձևաչափով, որի ժամանակ էլ Հայրապետյանի հրաժարականը հրատապ կարգով ընդունվել է: Սա հավանաբար արվել է այն նպատակով, որ խորհրդի նիստում՝ նոյեմբերի 8-ին, արդեն իսկ ներկայացվի ՍԱՏՄ ղեկավարի թեկնածուն:
Հատկանշական է, որ խոսքն այն կառավարության մասին, որը մեկ ամիս չէր կարողանում արդարադատության նախարարի թեկնածու գտնել: Այստեղից հետևություն. կա՛մ կառավարությունը չի գիտակցում ՍԱՏՄ կարևորությունը, կա՛մ հենց հերթը հասնում է յուրայիններին, սպասելու կարիք այլևս չկա:
MediaHub-ի տեղեկություններով՝ ՍԱՏՄ ղեկավար կնշանակվի վարչապետի աշխատակազմի տեսչական մարմինների աշխատանքների համակարգման գրասենյակի ղեկավարի տեղակալ Արմեն Դանիելյանը, ով համարվում է Արայիկ Հարությունյանի «մարդը»: Ի դեպ, ամիսներ շարունակ մամուլը գրում էր այն մասին, որ Դանիելյանը աշխատում է Հայրապետյանի դեմ, որպեսզի զբաղեցնի վերջինիս պաշտոնը, սակայն ամիսներ առաջ նրա թեկնածությանը Նիկոլ Փաշինյանը հավանություն չի տվել:
Ճիշտ է, MediaHub-ի հետ զրույցում Հայրապետյանն այսօր ասել էր, թե հեռանալու պատճառը խիստ անձնական է, սակայն 2018-ից հետո պետական համակարգում գրեթե բոլոր հրաժարականները հենց անձնական պատճառաբանությամբ են հրամցվում հասարակությանը:
