Ես ո՛չ Ռուբեն Վարդանյանի, ո՛չ Արայիկ Հարությունյանի կողմնակիցը չեմ․ Արցախի գլխավոր դատախազ
Մամուլում այսօր շրջանառվեցին լուրեր, թե Արցախում ընդդեմ Ռուբեն Վարդանյանի ձևավորված «կոալիցիան» նաև նախագահի իր թեկնածուն ունի և այդ թեկնածուն Արցախի գլխավոր դատախազ Գուրգեն Ներսիսյանն է։
MediaHub.am-ը զրուցեց Ներսիսյանի հետ՝ պարզելու, թե որքանո՞վ են այս տեղեկությունները համապատասխանում իրականությանը։
- Պարոն Ներսիսյան, բնական է ծանոթ եք մամուլում շրջանառվող լուրերին։ Իսկապե՞ս հավակնում եք Արցախի նախագահի պաշտոնին։
-Այս պահին նախագահական ընտրություններ չկան Արցախում, որ ես ինձ որևէ պաշտոնում տեսնեմ կամ չտեսնեմ։
- Այդ դեպքում ի՞նչ ընդդեմ կոալիցիայի մասին է խոսքը։
- Որևէ մեկի հետ կոալիցիա չեմ կազմել։ Հրապարակման մեջ նշվում է Մասիս Մայիլյանի, Հայկ Խանումյանի անունները, ասեմ, որ նրանց հետ երբևէ, որևէ տեսակի անձնական շփում կամ հարաբերություն չեմ ունեցել, և պաշտոնական շփման առիթներ գրեթե չեն եղել։
- Եթե տեղեկությունները որևէ կերպ իրականությանը չեն համապատասխանում, ապա ովքե՞ր և ի՞նչ նպատակով են հարցն օրակարգ բերել։
- Արցախում Սահմանադրությունը փոփոխելու և Սահմանադրության մեջ փոփոխություններ կատարելու իրավունքն ԱԺ-ին վերապահելու գործընթացում ես դեմ էի և կտրուկ ջանքերի արդյունքում այդ փորձը կանխվել է, որը որոշ շրջանակներ շատ ծանր են տարել և բնական է, որ այդ կետից կարող էին այս բնույթի հրապարակումներ լինել։ Բայց սա ոչինչ չի նշանակում․ գլխավոր դատախազն Արցախի նվիրյալն է և անկախ անձանց կարգավիճակից՝ այս երկրի տերը մենք ենք և մենք ենք որոշում, թե որն է մեր երկրի՝ Արցախի ապագայի լավագույն տարբերակը, իսկ այն արդեն որոշված է։
- Հրապարակման մեջ նշվում է, որ կոալիցիան ընդդեմ Ռուբեն Վարդանյանի է, այսինքն ստացվում է, որ Արցախում «թևերի են բաժանվել»: Դուք ո՞ւմ կողմնակիցն եք Ձեզ համարում։
- Ես ոչ մեկի կողմնակիցը չեմ՝ ո՛չ Ռուբեն Վարդանյանի, ո՛չ Արայիկ Հարությունյանի։ Ես գլխավոր դատախազ եմ և իրականացնում եմ Սահամանադրությամբ ինձ վերապահված լիազորությունները, որը կողմնապահության հնարավորություն չի ենթադրում․ անաչառությունը, օբյեկտիվությունն արդեն ենթադրում են, որ դու չես կարող ցանկության դեպքում էլ կողմնապահություն անել։
Լիաննա Թորոսյան