Իսրայելը հասկացրել է, որ չի փոխի քաղաքականությունն իր ենթադրյալ միջուկային զինանոցի հարցում:
Վարչապետ Յաիր Լապիդի հազվագյուտ, թեեւ քողարկված հայտարարությունը հնչեցվել է 1970-ի Միջուկային զենքի չտարածման պայմանագրի երկրների՝ Նյու Յորքում կայացած համաժողովի ժամանակ, փոխանցում է Reuters-ը:
Իսրայելը չի ստորագրել պայմանագիրը, որը միջուկային էներգիայի հասանելիություն է առաջարկում՝ միջուկային զենքից հրաժարվելու դիմաց:
Դիմելով Իսրայելի ատոմային էներգիայի հանձնաժողովին՝ Լապիդը խոսել է «երկրի պաշտպանական եւ հարձակողական հնարավորությունների, ինչպես նաեւ այն մասին, ինչն արտասահմանյան ԶԼՄ-ներում «այլ հնարավորություններ» է կոչվում:
«Այդ այլ հնարավորությունները մեզ ողջ են պահպանում են մեր կյանքը եւ կպահպանեն, քանի դեռ մենք եւ մեր երեխաները այստեղ ենք»,- ասել է նա:
Տասնամյակներ տեւած երկիմաստության քաղաքականության համաձայն, որն ուղղված է շրջապատող թշնամիների զսպմանն ու սադրանքներից խուսափելուն, որոնք կարող են սպառազինությունների մրցավազք առաջացնել, Իսրայելը ոչ հաստատում է եւ ոչ էլ հերքում, որ միջուկային զենք ունի:
Վերլուծաբանները կարծում են, որ դա այդպես է, քանի որ առաջին ռումբը Իսրայելը ստացել է 1966 թվականի վերջին։ Իսրայելցի լրագրողները, որոնք սահմանափակված են ռազմական գրաքննությամբ, հաճախ գաղտնի կերպով ակնարկում են այդպիսի հնարավորություններին կամ մեջբերում են արտասահմանյան ԶԼՄ-ների հաղորդումները դրանց մասին:
«ԱՄՆ-ն վերահաստատում է ապագա սերունդների համար այս կարեւոր պայմանագիրը պահպանելու եւ ամրապնդելու մեր հանձնառությունը»,- Twitter-ում գրել է ԱՄՆ պետքարտուղար Էնթոնի Բլինքենը, ով եւս մասնակցում էր համաժողովին: