Խորհրդարանական ընդդիմության առաջադրած ՄԻՊ թեկնածու Էդգար Ղազարյանը Մարդու իրավունքների նախկին պաշտպան Լարիսա Ալավերդյանի խոսքով չի ընտրվելու, ՔՊ-ն նրան չի ընտրելու։
«Ես կարծում եմ, որ ընդդիմությունը համաձայնվել է նրա թեկնածությանը, քանի որ համարել է, որ հասարակությունը պետք է ծանոթանա այլընտրանքային մոտեցումներին, տվյալ դեպքում զանգվածային բնույթ կրող մարդու իրավունքների ոտնահարումներին։ Բայց կարծում եմ, որ որեւէ մեկը այսօր չի կասկածում, որ ՔՊ-ն չի ընտրելու իրեն»,-MediaHub-ի հետ զրույցում ասաց Ալավերդյանը։
Ըստ նրա՝ ՄԻՊ լինելու պահանջներից ամենակարեւորը հասարակության կողմից ճանաչված լինելն է՝ դրական աշխատանքվ։ Այս առումով էդգար Ղազարյանն, ասում է, ամբողջովին համապատասխանում է, միշտ արտահայտել է հասարակության այս կամ այն խնդիրները։
Իսկ որքանո՞վ է հասարակությունը լուրջ վերաբերվում Էդգար Ղազարյանին, որը ոչ վաղ անցյալում վարչապետ էր ուզում դառնալ, ավելին՝ օր ու ժամ էր հայտարարել՝ Նիկոլ Փաշինյանի հրաժարականի մասին, Լարիսա Ալավերդյանը մեկնաբանում է․
«Դուք ճիշտ եք ասում, դա կարելի է համարել Ղազարյանի կողմից ոչ ճիշտ հաշվարկված քաղաքական քայլ։ Բայց միշտ չէ, որ այդպիսի գործոնը պետք է կարեւոր լինի։ Բայց կա ամբողջովին համոզմունք, որ ինքը չի ընտրվելու»։
Նշենք, որ «Պատիվ ունեմ» խմբակցության ղեկավար Հայկ Մամիջանյանն ավելի վաղ մեզ հետ զրույցում ասել էր, որ Ղազարյանի ընտրության հարցում հիմք են հանդիսացել նաև հասարակական-քաղաքական կազմակերպությունների դիմումները։
«Կազմակերպությունները առաջարկում էին առաջադրել Էդգար Ղազարյանին։ Նաեւ կարեւորելով ինքնաառաջադրման պատրաստակամությունը, որոշեցինք ընդունել արտախորհրդարանական ընդդիմության առաջարկը»,-ասել էր Մամիջանյանը։
Էդգար Ղազարյանն այսօր հայտարարել էր, թե ՔՊ-ն թեկնածու չի առաջադրելու ու միաձայն իրեն է ընտրելու, քանի որ պարտավոր են։ Նրան ի պատասխան ՔՊ-ական պատգամավոր Վաղարշակ Հակոբյանն արձագանքել էր․
«Էդգար Ղազարյանը նույն ինքնավստահությամբ վարչապետի թեկնածու է եղել։ Եւ քանի որ «Քաղաքացիական պայմանագիրը» ժողովրդավարություն ունեցող խմբակցություն է, մենք ըմբռնումով ենք մոտենում պարոն Ղազարյանի թեկնածու լինելու նկրտումներին»։
Հիշեցնենք, որ ՄԻՊ թեկնածուի ընտրությունը տեղի է ունենալու ԱԺ մարդու իրավունքների պաշտպանության հանրային հարցերի մշտական հանձնաժողովում։
Ավելի վաղ, հանձնաժողովի նախագահ Թագուհի Թովմասյանը հայտնեց, որ
Ազգային ժողովի «Պատիվ ունեմ» և «Հայաստան» խմբակցությունները համատեղ նիստում որոշել են Հայաստանի Հանրապետության մարդու իրավունքների պաշտպանի թափուր պաշտոնում առաջադրել Էդգար Ֆերդինանդի Ղազարյանի թեկնածությունը` նկատի ունենալով, որ մի շարք հասարակական նախաձեռնություններ և իրավապաշտպաններ երկրում մարդու իրավունքների պաշտպանության ոլորտում առկա վիճակը գնահատել են խիստ մտահոգիչ, իսկ լուծման ուղղությամբ գործող իշխանությունների կողմից իրականացվող քաղաքականությունը՝ ձևախեղված։
Լիա Սարգսյան