Այսօր հայտնի դարձավ, որ ԱԺ ընդդիմադիր «Հայաստան» եւ «Պատիվ ունեմ» խմբակցությունները ՀՀ մարդու իրավունքների պաշտպանի թափուր պաշտոնում առաջադրել են Էդգար Ղազարյանի թեկնածությունը։ Ընդդիմադիրների այս որոշումը զարմանք ու վրդովմունք է առաջացրել քաղաքական թիմերի աջակիցների շրջանում, ովքեր պահանջում են՝ հաշվետու լինել եւ պարզաբանել, թե ինչու՞ է ընտրությունը կանգ առել Էդգար Ղազարյանի վրա։
MediaHub-ի հետ զույցում «Պատիվ ունեմ» խմբակցության ղեկավար Հայկ Մամիջանյանն ասաց, որ Ղազարյանի ընտրության հարցում հիմք են հանդիսացել նաև հասարակական-քաղաքական կազմակերպությունների դիմումները։
«Կազմակերպությունները առաջարկում էին առաջադրել Էդգար Ղազարյանին։ Նաեւ կարեւորելով ինքնաառաջադրման պատրաստակամությունը, որոշեցինք ընդունել արտախորհրդարանական ընդդիմության առաջարկը»,-ասաց Մամիջանյանը։
Էդգար Ղազարյանին՝ ՄԻՊ թեկնածու առաջադրելու համար խորհրդարանական ընդդիմությանը դիմել է նաեւ Հայաստանի Դեմոկրատական կուսակցության նախագա Արամ Գասպարի Սարգսյանը։
ՄԻՊ թեկնածուի ընտրությունը տեղի է ունենալու ԱԺ մարդու իրավունքների պաշտպանության հանրային հարցերի մշտական հանձնաժողովում։
Ավելի վաղ, հանձնաժողովի նախագահ Թագուհի Թովմասյանը հայտնեց, որ
Ազգային ժողովի «Պատիվ ունեմ» և «Հայաստան» խմբակցությունները համատեղ նիստում որոշել են Հայաստանի Հանրապետության մարդու իրավունքների պաշտպանի թափուր պաշտոնում առաջադրել Էդգար Ֆերդինանդի Ղազարյանի թեկնածությունը` նկատի ունենալով, որ մի շարք հասարակական նախաձեռնություններ և իրավապաշտպաններ երկրում մարդու իրավունքների պաշտպանության ոլորտում առկա վիճակը գնահատել են խիստ մտահոգիչ, իսկ լուծման ուղղությամբ գործող իշխանությունների կողմից իրականացվող քաղաքականությունը՝ ձևախեղված։
Այսպիսով, այս պահի դրությամբ ԱԺ մարդու իրավունքների պաշտպանության և հանրային հարցերի մշտական հանձնաժողովը պաշտոնապես ստացել է մեկ թեկնածուի առաջադրման վերաբերյալ համապատասխան փաստաթղթեր, որոնք առնչվում են բացառապես Էդգար Ղազարյանին։
Թագուհի Թովմասյանը նաև հայտնել է, որ Անահիտ Մանասյանի վերաբերյալ քաղաքական հայտարարությունները դեռ իրավական որևէ գործողության չեն վերածվել, և իշխող «Քաղաքացիական պայմանագիր» խմբակցությունը մինչ այս պահը ԱԺ մարդու իրավունքների պաշտպանության և հանրային հարցերի մշտական հանձնաժողովին որևէ թեկնածու չի առաջադրել։
Լիա Սարգսյան