Գիշերը հանգիստ է եղել, բայց երբ սկսում են կրակել, հասկանում ենք, որ իրենց ուզածը միայն Ղարաբաղը չէր, այլ Սյունիքը
Գիշերը Սյունիքի սահմանամերձ բնակավայրերում հանգիստ է եղել:
«Չեն կրակել»,- վստահեցնում են Խոզնավար և Խնածախ գյուղերի բնակիչները։ Մարտի 20-ից սկսած Ադրբեջանը հրաձգային տարբեր տեսակի զինատեսակներով պարբերաբար խախտել է հրադադարի պահպանման ռեժիմը։
Հայաստանի պաշտպանության նախարարությունն օրական մի քանի անգամ ստիպված էր հերքել ադրբեջանական կողմի հաղորդագրությունները, թե իբր հայկական կողմն է կրակ բացել ադրբեջանական դիրքերի ուղղությամբ։ Սյունեցիները անցած գիշեր հանգիստ են քնել։
«Մեզ համար ևս զարմանալի է, որ չեն կրակել։ Եթե այս հանգստությունը պահպանվաի՝ միայն ուրախ կլինենք։ Մեկ-մեկ մտածում ենք, որ մեծ հարձակումները սկսվում են փոքր կրակոցներից։ Գյուղերում անհանգիստ են»,- ասաց Խնածախի բնակիչը։
Նախորդ օրերի հրաձգության հետևանքով՝ ադրբեջանական կողմի կրակից վնասվել է խոզնավարցի Պետրոսյանների ընտանիքի տան տանիքը, այնուհետև գնդակը հայտնվել էր Խնածախի վարչական ղեկավար Սեյրան Միրզոյանի տանը, վնասել պատն ու լուսամուտը։
«Նախորդ օրերին շատ վատ էր, դիրքերն էնքան մոտ է, որ մտածում էինք թե մեր տներին են կրակում։ Հայկական կողմը երբեք պատասխան կրակ չի բացում։ Մեր տղերքի ցավը տանեմ, մեզ հանգստացնում են, ասում են՝ «անհրաժեշտ լինի կանենք ինչ պետք ա, ոնց պետք ա, բայց մի վախեցեք»»,- հավելեց մեր զրուցակիցը։
Սյունիքի մարզի Տեղ խոշորացված համայնքում ևս անհանգիստ են։ Չնայած այն բանի, որ անցած գիշեր հրադադարը չի խախտվել, այնուամենայնիվ մտահոգություն կա, որ Ադրբեջանը պատրաստվում է լայնածավալ հարձակման։
«Մեզ փորձում ենք շեղել իրականությունից, զբաղվում ենք մեր գործերով, առօրյա կյանքով, բայց երբ սկսում են կրակել, հասկանում ենք, որ իրենց ուզածը միայն Ղարաբաղը չէր, այլ Սյունիքը, որի մասին երազում են երկար տարիներ, բայց 2020-ից հետո՝ շրջանառության մեջ դրվեց «Զանգեզուրի միջանցք» տերմինը»,- ասում է Տեղի բնակչուհին։
Հունան Թադևոսյան
