ՊՎԾ ստուգումնե՞ր, հավելավճարնե՞ր. ո՞րն է ուռուցքաբանության կենտրոնի տնօրենի ազատման պատճառը

Քիչ առաջ մամուլը գրեց, որ Վ․ Ֆանարջյանի անվան ուռուցքաբանության ազգային կենտրոնի տնօրեն Նարեկ Մանուկյանը աշխատանքից ազատման դիմում է գրել: MediaHub-ը ճշտեց որոշ մանրամասներ, թե ինչն է դրդել Մանուկյանին ազատման դիմում գրել:

Մեր աղբյուրի համաձայն՝ Նարեկ Մանուկյանը ապրիլի 1-ով է ազատման դիմում գրել , սակայն նրա հեռացման մասին հայտնի է դարձել դրանից մի քանի օր առաջ: Այս պահին նրան փոխարինում է բժիշկ Կարեն Ծառուկյանը, սակայն նա չի նշանակվելու այդ պաշտոնին: Թե ում են նշանակելու Վ․ Ֆանարջյանի անվան ուռուցքաբանության ազգային կենտրոնի տնօրեն այս պահին մեզ չհայտնեցին, պարզապես նշեցին, որ որոշում կա՝ դրսից են մարդ նշանակելու:

Նշենք, որ Նարեկ Մանուկյանն ու ՀՀ առողջապահության նախարար Անահիտ Ավանեսյանը տևական ժամանակ լարված հարաբերություններ ունեին, նախևառաջ այն պատճառով, որ Նարեկ Մանուկյանը տարիներ շարունակ լոբինգ է անում, որ իրեն նշանակեն նախարար: Դեռ դա նրան չի հաջողվել, փոխարենը նա այս տարիներին արեց ամեն ինչ, որ իր տնօրենի պաշտոնը բավականին եկամտաբեր լինի. նրա ամենամսյա աշխատավարձի չափի մասին լեգենդներ են պտտվում, քանի որ, ասում են, իր մտերիմներով մի շրջանակ ուներ, որոնց էլ բաժին էին հասնում ամենաբարձր գներով վիրահատությունները:

MediaHub-ի աղբյուրի փոխանցմամբ, Նարեկ Մանուկյանին պարտադրել են ազատման դիմում գրել ՊՎԾ ստուգումներից հետո, որոնք միլիարդավոր դրամների շեղումներ են հայտնաբերել: Բացի այդ, փաստացի Նիկոլ Փաշինյանի խոսքից են «թռել» և դա վերևները օգտագործել են Մանուկյանի դեմ, որի վրա վաղուց ատամ ունեին: 

Ինչի՞ մասին է խոսքը: Նիկոլ Փաշինյանը հայտարարել է, որ ԲԿ-ները պետք է քաղաքացիներին վերադարձնեն վճարած գումարների հավելավճարները, այսինքն՝ այն դեպքերում, երբ, օրինակ, պետպատվերով վիրահատությունն արժե իքս գումար, բայց ԲԿ-ն պարտադրել է վճարել ավելին՝ դրամարկղ, դրանք պետք է վերադարձվեն քաղաքացիներին: Եվ ահա ԲԿ-ներում այս որոշումը փորձում են շրջանցել:

Մեզ ասացին, որ քաղաքացիներին զանգահարում են և հրավիրում հավելավճարները հետ ստանալու համար, բայց դրամարկղից հորդորում են նախ մոտենալ իրենց բուժող բժշկին, որոնք էլ ազդում են քաղաքացիների խղճի վրա՝ նշելով, թե այդ գումարը, որ հիմա հետ կստանան, իրենցից են պահելու, իրենք են դա վճարելու իրենց գրպանից: Արդյունքում քաղաքացիներից շատերը հրաժարվում են մոտենալ դրամարկղին և ստանալ գումարները:

Նաև այս սխեման է հայտնի դարձել, դրան գումարվել է ՊՎԾ-ի ստուգման խայտառակ արդյունքներն ու Նարեկ Մանուկյանին խնդրել են հեռանալ: Այդուհանդերձ, մեր աղբյուրը հորդորեց չհամարել, թե սրանով Նարեկ Մանուկյանի կարիերան ավարտվեց և չհրաժարվել այն մտքից, որ նա մի օր կդառնա նախարար կամ գոնե փոխնախարար, քանզի բոլորին է հայտնի Փաշինյանի կադրային քաղաքականության թշվառությունը:

Սպասենք զարգացումների: