Ես կարծում եմ, որ այո՛, մանդատ վայր դնելը ճիշտ էր, ես նման որոշում եմ կայացրել և իրականացրել եմ: Այս մասին այսօր լրագրողների հետ ճեպազրույցում հայտարարեց «Հայրենիք» կուսակցության նախագահ Արթուր Վանեցյանը, ով միացել է հանուն Արցախի ստորագրահավաքին:
Խորհրդարանական ընդդիմության հետ, հավաստիացրեց նա, որևէ տարաձայնություն չունի:
Ինչ վերաբերում է հարցին, թե արդյոք կուսակցությունը, ինչպես հայաստանյան քաղաքական մյուս ուժերը պատրաստվում է Երևանի ավագանու ընտրություններին, Արթուր Վանեցյանն արձագանքեց.
«Այս փուլում խոսել Երևանի ավագանու ընտրությունների մասին տեղին չէ: Նիկոլի Հայաստանում, երբ չգիտենք, թե ինչ վիճակ է լինելու վաղը, ընտրություններից խոսելը տեղին չէ: Ես կարծում եմ, որ մեր հանրության զգալի մասը ինձ ճիշտ չի հասկանա, եթե ես այսօր խոսեմ ընտրություններին մասնակցելու մասին, որովհետև մենք այսօր կանգնած ենք լրջագույն խնդրի առջև. մենք ամեն օր կորցնում ենք ՀՀ սուվերեն տարածքից, Արցախում 120 000 մեր հայրենակիցներ այսօր կանգնած են բնաջնջման սպառնալիքի առջև, և ես խոսեմ ընտրությունների՞ց»,- հարցադրում արեց նա:
Այդուհանդերձ, Արթուր Վանեցյանը հավելեց, որ «Հայրենիք» կուսակցությունը մշտապես մասնակցում է ցանկացած քաղաքական գործընթացի և կրկնեց՝ եթե օրը գա և որոշեն մասնակցել ընտրություններին, ապա ըստ պատշաճի կտեղեկացնեն:
Մանրամասները՝ տեսանյութում։