Սննդամթերքի անվտանգության տեսչական մարմինը ներկայացրել է 2025 թվականի ընթացքում իրականացված վերահսկողական միջոցառումների ամփոփ տվյալները։ Ըստ ներկայացված տեղեկատվության՝ դեկտեմբերի 1-ի դրությամբ փաստացի իրականացվել է 1 249 ստուգում, որոնցից 644-ը եղել են պլանային, իսկ 605-ը՝ արտապլանային։ Այդ ստուգումներից 58-ը դեռևս գտնվում են ամփոփման փուլում։

Բացի ստուգումներից, Տեսչական մարմինը իրականացրել է նաև 716 դիտարկում, որոնց ընթացքում արձանագրվել է 241 խախտում՝ ներառյալ բուսասանիտարիայի ոլորտը։ Անասնաբուժության շրջանակում իրականացվել է 4 610 մշտադիտարկում, որի արդյունքում արձանագրվել է 182 խախտում։

Տարվա ընթացքում իրականացված ստուգումների բաշխման համաձայն՝ դրանց մոտ 40 տոկոսը բաժին է ընկել սննդամթերքի արտադրություններին, 30 տոկոսը՝ հանրային սննդի կազմակերպություններին, 25 տոկոսը՝ իրացման կետերին, իսկ մնացած 5 տոկոսը՝ սպանդանոցներին և կենդանաբուծությամբ զբաղվող տնտեսավարողներին։

Բացահայտված խախտումները հիմնականում վերաբերել են սանիտարահիգիենիկ պահանջների չպահպանմանը, սանիտարական գրքույկների բացակայությանը կամ դրանց պարբերականության խախտմանը, անհրաժեշտ ուղեկցող փաստաթղթերի բացակայությանը, մակնշման անհամապատասխանություններին, ինչպես նաև ՎՎՀԿԿ/HACCP համակարգի չներդրմանը։

Միաժամանակ նշվում է, որ առավել քիչ են արձանագրվել պահման պայմանների անհամապատասխանություններն ու պետական գրանցման բացակայության դեպքերը։

Խախտումներ թույլ տված տնտեսավարողների նկատմամբ կիրառվել են վարչական պատասխանատվության տարբեր միջոցներ՝ նախազգուշացում և տուգանք։ Առանձին դեպքերում կիրառվել է նաև արտադրական գործունեության կասեցում։

Ներկայացված տվյալները հնարավորություն են տալիս պատկերացում կազմել սննդամթերքի անվտանգության ոլորտում իրականացվող վերահսկողության ծավալների և առավել հաճախ հանդիպող խնդիրների մասին՝ առանց գնահատականների կամ մեկնաբանությունների։

Էմմա Մարտիրոսյան