«Եթե գա այնպիսի պահ, որ ընդդիմադիր ճակատը հասնի հաջողության, Ազգային ժողովի ընտրություններում ձևավորի իշխանություն, և պարոն Ասլանյանին ու ինձ վերապահվի բարձրագույն պատիվ՝ այսօրվա վարչապետին ուղեկցել դեպի ԱԱԾ-ի «պադվալ», այդ ժամանակ էլի կլինեն մարդիկ, որ կասեն՝ բա որ ասում էինք Նիկոլի պրոյեկտն են, չէիք հավատում, տեսա՞ք, իրենք տարան ԱԱԾ-ի պադվալ, ապահով տեղ, որպեսզի փրկեն ժողովրդի դատաստանից»,- երեկ մամուլի ասուլիսի ժամանակ նման հայտարարություն է արել ՄԱՍԿ-ի համահիմնադիր Հովիկ Աղազարյանը։

Նախկին ՔՊ-ական Հովիկ Աղազարյանին MediaHub-ը հարցրեց՝ որպես Փաշինյանի նախկին թիմակից, եթե գա իշխանության, Նիկոլ Փաշինյանի ո՞ր արարքի համար նրան կուղարկի ԱԱԾ․ «Քաղաքական առումով ես գտնում եմ, որ ինքը շատ սխալ բաներ է արել և անում, որոնք լուրջ հետևանքներ են ունենում մեր պետականության և էս պահին պետականության հետ կապված հարցերի վրա, ինչպես նաև ապագայի հետ կապված լուրջ վտանգներ են պարունակում, ես էդ բաները և՛ հաստատում եմ, և՛ գտնում, որ 1 օր շուտ իր հեռացումը իշխանությունից օգուտ կլինի Հայաստանի պետականության համար»։

Աղազարյանի խոսքով՝ իր և ՔՊ-ի «հակամարտությունը» սկսվել է դեռ 4 տարի առաջ, երբ ինքը փորձել է բարձրացնել հարցեր, որոնք դուր չեն եկել իշխող ուժին։

Հովիկ Աղազարյանը հավելեց, որ ինքն ու Հակոբ Ասլանյանը խանգարում էին Նիկոլ Փաշինյանի ավտորիտար ռեժիմին։ 

Ըստ նրա՝ Փաշինյանի ամենամեծ սխալը եղել է եվրոպական լիդերներին խաբվելը։

«Երբ 2022 թ․-ի հոկտեմբերին Պրահայում ճանաչեց Ադրբեջանի տարածքային ամբողջականությունը, և Արցախը  ՝ որպես Ադրբեջանի տարածքային մաս, դրանից պետք է բխեին ուրիշ, կոնկրետ քայլեր՝ Արցախի մեր հայրենակիցների այսպես կոչված ինքնորոշման իրավունքի բարձրացման հետ կապված, այսինքն՝ տարածքային ամբողջականությունը տարածքային ամբողջականություն, բայց ազգերի ինքնորոշումը պետք է դառնար առաջնային պլան»,- եզրափակեց խոսքը Հովիկ Աղազարյանը։ 

Էմմա Մարտիրոսյան