Ուկրաինայի Բարձրագույն հակակոռուպցիոն դատարանը երկու ամսով կալանավորել է Ուկրաինայի նախագահի աշխատակազմի նախկին ղեկավար Անդրեյ Երմակին՝ 140 միլիոն գրիվնա գրավի հնարավորությամբ, հաղորդում է UNIAN-ը։

Դատարանի որոշումից հետո Երմակը հայտարարել է, որ հերքում է մեղադրանքները և մտադիր է բողոքարկել այն։ «Ես մնում եմ Ուկրաինայում։ Ես թաքցնելու ոչինչ չունեմ», - ասել է նա։

Երմակը նշել է, որ ինքը 140 միլիոն գրիվնա չունի գրավ վճարելու համար. նրա փաստաբանները միջոցներ կփնտրեն «ընկերների և ծանոթների շրջանում»։

Երմակի փաստաբան Իգոր Ֆոմինը, չորեքշաբթի օրը Բարձրագույն հակակոռուպցիոն դատարանում կայացած նիստում ելույթ ունենալով, հայտարարել է, որ կասկածի մասին ծանուցումը անհիմն է։ Նա պնդել է, որ մեղադրանքի կողմը չի հիմնավորել իր դիրքորոշումը Երմակի ձերբակալության անհրաժեշտության վերաբերյալ։ «Նախնական կալանքը բացառիկ կանխարգելիչ միջոց է, որը կիրառվում է միայն այն դեպքում, եթե դատախազը ապացուցի, որ ոչ մի ավելի մեղմ կանխարգելիչ միջոց չի կարող կանխել ռիսկերը», - ասել է Ֆոմինը։

Մայիսի 11-ին Ուկրաինայի ազգային հակակոռուպցիոն բյուրոն և Կոռուպցիայի դեմ պայքարի մասնագիտացված դատախազությունը մեղադրանք են առաջադրել Երմակի դեմ: Իրավապահ մարմինները կարծում են, որ նա կազմակերպված խմբի անդամ է, որը ներգրավված է Կիեւի մարզում շքեղ շինարարական նախագծերից 460 միլիոն գրիվնայի (ավելի քան 10,4 միլիոն դոլար) լվացման մեջ:

Հրապարակված ձայնագրություններում Երմակը հանդես է գալիս որպես P2: Հետաքննիչների տվյալներով՝ 2021 թվականին և 2022 թվականի սկզբին նա «Դինաստիա» կոոպերատիվում առանձնատան վերանորոգման հարցը քննարկել է դիզայների հետ, ինչպես հաղորդում է «Ստրանա» հրատարակությունը: Շինարարությունը վերահսկել է Ալեքսեյ Չերնիշովը, որն այդ ժամանակ Ուկրաինայի համայնքների և տարածքների զարգացման նախարարն էր: