Ֆրանսիայի նախագահ Էմանուել Մակրոնը հայտարարել է, որ հեռախոսազրույց է ունեցել Իրանի նախագահ Մասուդ Պեզեշկիանի հետ:

Մակրոնը դատապարտել է «Իրանի կողմից Արաբական Միացյալ Էմիրությունների քաղաքացիական ենթակառուցվածքների և նավերի վրա անհիմն հարձակումները», ինչը Թեհրանն արդեն հերքել էր։

«Բոլոր կողմերը պետք է անհապաղ և անվերապահորեն վերացնեն նեղուցի շրջափակումը։ Անհրաժեշտ է կայուն վերադարձ դեպի նավարկության լիակատար ազատությունը, որը գոյություն ուներ հակամարտությունից առաջ», - գրել է Մակրոնը X սոցիալական ցանցում։

Ֆրանսիայի նախագահը նշել է, որ Ֆրանսիայի և Միացյալ Թագավորության կողմից ձևավորված բազմազգ առաքելությունը կարող է օգնել վերականգնել նավատերերի և ապահովագրողների վստահությունը։ Առաքելությունն իր բնույթով «կլինի պատերազմող կողմերից առանձնացված»։ Մակրոնը բացատրել է, որ «Շառլ դը Գոլ» ավիակիրի նախնական տեղակայումը տարածաշրջան այս ջանքերի մի մասն է։

«Վերջին իրադարձությունները հստակ ցույց են տալիս նման առաքելության օգտակարությունը։ Ես կոչ արեցի Իրանի նախագահին օգտվել այս հնարավորությունից և մտադիր եմ քննարկել այս հարցը նախագահ [ԱՄՆ նախագահ Դոնալդ] Թրամփի հետ», - նշել է Ֆրանսիայի առաջնորդը։

Ըստ Էլիսեյան պալատաի ղեկավարի՝ Հորմուզի նեղուցում հանգստության վերականգնումը կօգնի առաջ մղել միջուկային հարցերի, բալիստիկ հրթիռների և տարածաշրջանային իրավիճակի շուրջ բանակցությունները։ «Եվրոպացիները, ովքեր պատասխանատու են պատժամիջոցների վերացման համար, կզբաղեցնեն իրենց տեղը այս գործընթացում», - եզրափակել է Մակրոնը։