Եվրոպական Միության առաջնորդները հավաքվել են արտակարգ գագաթնաժողովի՝ քննարկելու ԱՄՆ-ի հետ հարաբերությունների փոփոխվող դինամիկան՝ Գրենլանդիայի վերաբերյալ Թրամփի սպառնալիքների պատճառով ստեղծված անկայունության և անորոշության ֆոնին։ Չնայած Թրամփը վերջերս հրաժարվել է եվրոպական ապրանքների վրա մաքսատուրքեր սահմանելուց, իրավիճակը շարունակում է լարված մնալ։

«ԵՄ-ն շարունակում է հարմարվել ԱՄՆ-ի հետ իր հարաբերություններում նոր «նորմալին», որը վերջին ամիսներին զգալի փոփոխությունների է ենթարկվել, այդ թվում՝ Գրենլանդիան անեքսիայի ենթարկելու սպառնալիքներով ու մրցակից միջազգային կազմակերպության ստեղծմամբ [Դոնալդ Թրամփի «Խաղաղության խորհուրդ»]», - գրել է «The Guardian»-ը։

Գերմանիայի կանցլեր Ֆրիդրիխ Մերցը շնորհակալություն է հայտնել ԱՄՆ նախագահին իր դիրքորոշումը վերանայելու համար՝ նշելով, որ «եվրոպական միասնությունն ու վճռականությունը» կարևոր դեր են խաղացել Գրենլանդիայի ինքնիշխանության պաշտպանության մեջ։ Մերցը նաև ընդգծել է, որ ՆԱՏՕ-ն մնում է ԵՄ-ի և ԱՄՆ-ի միջև համագործակցության կարևոր գործիք։

Ֆրանսիայի նախագահ Էմմանուել Մակրոնն ասել է, որ «երբ Եվրոպան միասնական է, այն ուժեղ է», և կոչ է արել շարունակել միաձայնությունն անվտանգության հարցերում: Նա նշել է, որ Արկտիկան ու Հյուսիսատլանտյան օվկիանոսը պետք է շարունակեն մնալ ՆԱՏՕ-ի երկրների առաջնահերթություն՝ տարածաշրջանը կայունացնելու իրենց համատեղ ջանքերում։

Լեհաստանի վարչապետ Դոնալդ Տուսկը նշել է, որ ԵՄ-ն պետք է խուսափի «հարկադրական պրակտիկայից» ԱՄՆ-ի հետ իր հարաբերություններում՝ հիշեցնելով, որ «առաջնորդությունը» գերիշխանություն չէ, այլ փոխադարձ հարգանքի հիման վրա աշխատելու ունակություն։

Վերջին լարվածությանը չնայած՝ Եվրոպան շարունակում է Միացյալ Նահանգներին դիտարկել որպես կարևոր ռազմավարական գործընկեր: ԵՄ առաջնորդները նշել են, որ պատրաստ չեն «հրաժարվել 80 տարվա լավ հարաբերություններից», չնայած ներկայիս վարչակազմի անկանխատեսելիությանը։