2026 թվականի հունվարի 1-ից, համաձայն Վրաստանի «Զբոսաշրջության մասին» օրենքի, երկիր մուտք գործող բոլոր զբոսաշրջիկների համար պարտադիր է դառնում առողջության և դժբախտ պատահարի ապահովագրության առկայությունը, հայտնել է Վրաստանի արտաքին գործերի նախարարությունը։

Վրաստան մուտք գործող զբոսաշրջիկը պարտավոր կլինի ներկայացնել ապահովագրության առկայության վերաբերյալ փաստաթուղթ՝ ֆիզիկական կամ էլեկտրոնային տարբերակով, վրացերեն կամ անգլերեն։ Ապահովագրական փաստաթուղթը կարող է տրամադրվել, և՛ վրացական, և՛ միջազգային ապահովագրական ընկերությունների կողմից։ 

Ապահովագրական գումարը պետք է կազմի նվազագույնը 30․000 լարի։

Ապահովագրական ծածկույթը պետք է պարունակի հետևյալը

• Ապահովագրական պայմանագրի կողմեր;
• Ծածկույթի տարածք;
• Ապահովագրության առարկա;
• Ապահովագրական ժամանակահատվածի մեկնարկի և ավարտի ժամկետներ;
• Ապահովագրված ռիսկեր;
• Ապահովագրական գումարի չափ;
• Ապահովագրական վճարի չափ, վճարման վայր և ժամկետ։

Ապահովագրությունը պետք է գործի զբոսաշրջիկի՝ Վրաստան մուտք գործելուց մինչև մեկնումը այնտեղ եղած ողջ ժամանակահատվածի ընթացքում։