Հունաստանը պետք է թեքվի սխալ ճանապարհից, ասել է Թուրքիայի նախագահ Ռեջեփ Թայիփ Էրդողանը։

Ղրղզստանից վերադարձող ինքնաթիռում լրագրողների հարցերին պատասխանելով՝ Էրդողանը նախազգուշացումներ է արել Հունաստանին, որը շարունակում է զինել Եգեյան ծովի ապառազմականացված կղզիները:

Էրդողանը հայտարարել է, որ Թուրքիայի չափավոր մոտեցումը չպետք է ընկալվի որպես թուլություն, և դիմելով Աթենքի վարչակազմին՝ «Մենք կանենք այն, ինչ անհրաժեշտ է» ուղերձով, կոչ է արել դադարեցնել կղզիների զինումը:

«Յուրաքանչյուր ոք, ով Թուրքիայի սառնասիրտ մոտեցումը ընկալում է որպես թուլություն, լուրջ սխալ է թույլ տալիս: Հունաստանը պետք է դադարեցնի ապառազմականացված կղզիների զինումը»,- ասել է նա։

Հունաստանի վարչապետ Կիրիակոս Միցոտակիսի այն հայտարարություններին, որ կղզիների վերաբերյալ ծրագրերը չեն փոխվի՝ չնայած Թուրքիայի առարկություններին, Էրդողանը պատասխանել է, որ սահմանները չպետք է փորձարկվեն:

Երբ Էրդողանին հարցրել են, թե ինչ քայլեր կձեռնարկի Թուրքիան, եթե Հունաստանը շարունակի զինել ապառազմականացված կղզիները, պատասխանել է. «Ի՞նչ պետք է անենք։ Ի՞նչ է մնում մեզ։ Անենք այն, ինչ անհրաժեշտ է։ Մենք ասում ենք, որ ուզում ենք համագործակցել Հունաստանի հետ բարիդրացիական հարաբերությունների հիման վրա։ Եթե մենք պատասխանեինք Հունաստանին մեր հողից, օրինակ՝ Քաշից, նրանք կլսեին, չէ՞։ Բայց մենք անկեղծ էինք ամեն ինչում։ Մենք այն կողմն էինք, որը կառուցողականորեն գործում էր։ Սակայն մենք հաճախ չէինք տեսնում մեր բարի կամքի դիմաց որևէ փոխադարձ փոխհատուցում։ Հունաստանը վերջապես պետք է հասկանա մեկ բան. Թուրքիան որևէ մեկի հողերի նկատմամբ պահանջներ չունի, բայց նաև թույլ չի տա, որ իր իրավունքները ոտնահարվեն»։