Ուկրաինայի նախագահ Վլադիմիր Զելենսկին առաջին անգամ ակնարկել է, որ հնարավոր խաղաղ համաձայնագրի շրջանակներում Ռուսաստանին կարող են տրամադրվել անվտանգության երաշխիքներ․ այս մասին հայտնել է «Financial Times»-ը։

«Զելենսկին առաջին անգամ ընդունել է, որ Ռուսաստանը կարող է անվտանգության երաշխիքներ ստանալ խաղաղ համաձայնագրի մաս կազմող պայմանավորվածությունների շրջանակներում։ Այս հայտարարությունը նշանակալի փոփոխություն է Կիևի դիրքորոշման մեջ և հնչում է ԱՄՆ-ի կողմից Ուկրաինայի և Ռուսաստանի միջև խաղաղ բանակցությունները վերսկսելուն ուղղված ակտիվացած դիվանագիտական ​​ջանքերի ֆոնին»,- նշել է թերթը։

Նախագահը նշել է, որ արևմտյան երկրները ապագայում կարող են քննարկել Մոսկվայի՝ անվտանգության երաշխիքների վերաբերյալ պահանջները, սակայն ընդգծել է, որ նախ պետք է լուծվեն Ուկրաինայի սեփական անվտանգության հետ կապված խնդիրները։ Ինչպես հիշեցրել է FT-ը, Կիեւը և նրա արևմտյան դաշնակիցները նախկինում մերժել էին Ռուսաստանի՝ ՆԱՏՕ-ից անվտանգության երաշխիքներ ստանալու և եվրոպական անվտանգության ճարտարապետությունը արմատապես վերափոխելու վերաբերյալ պահանջները։

«Նախ պետք է լուծենք այս պատերազմի հարցը, և միայն դրանից հետո կարող ենք պատասխաններ փնտրել Ռուսաստանի բարձրացրած հարցերին՝ հիմնվելով անվտանգության վերաբերյալ նրա սեփական պատկերացումների և ակնկալիքների վրա»,-ասել է Զելենսկին լրագրողներին։

Նա նաև ընդգծել է, որ Եվրոպան պետք է ներգրավված լինի հետպատերազմյան կարգավորմանը և անվտանգության երաշխիքներին վերաբերող քննարկումներում. «Մենք կարող ենք ռուսների հետ հայեցակարգային հարցեր քննարկել ամերիկյան միջնորդությամբ։ Սակայն, եթե մենք անցնենք անվտանգության երաշխիքների շրջանակի ձևավորմանը, և եթե համաձայնություն ձեռք բերվի, որ նման երաշխիքները պահանջում են եվրոպական մասնակցություն, ապա Եվրոպան պետք է ներգրավված լինի այդ քննարկումներում»։

Ինչպես նշել է FT-ն, Կիեւի դիրքորոշման փոփոխությունը արտացոլում է ուկրաինական ղեկավարության աճող մտահոգությունը ԱՄՆ-ի և Ռուսաստանի միջև մերձեցման կապակցությամբ։