MediaHub-ի ուշադրության կենտրոնում է հայտնվել ֆեյսբուքյան օգտատերերից մեկի բողոքը՝ կապված տրանսպորտի համակարգի հերթական խնդրի հետ։ Մասնավորապես, Ալյոնա Ղուկասյանը գրել է.

«Տրանսպորտային միջոցում ուղեվարձը վճարելու ընթացքում առաջացել էր տեխնիկական խնդիր։ Նույն քարտով երկու ուղևորատոմսի վճարումը հաջողությամբ կատարվել էր, սակայն երրորդ վճարման ժամանակ սարքավորումը չէր ցուցադրում վճարման հաստատումը։

Չնայած դրան՝ մենք որևէ կերպ չէինք հրաժարվում վճարումից և շարունակում էինք փորձել այն կատարել տարբեր եղանակներով, այդ թվում՝ այլ քարտով և այլ սարքավորման միջոցով։ Հետագայում պարզվեց, որ մեր բանկային քարտից գանձվել է նաև երրորդ ուղևորատոմսի արժեքը, սակայն վճարային սարքավորման վրա այն չէր արտացոլվել։ Սա վկայում է, որ խնդիրը կապված է եղել վճարային համակարգի կամ սարքավորման աշխատանքի հետ, այլ ոչ թե մեր կողմից վճարումից խուսափելու փորձի։

Չնայած դրան՝ վարորդը բարձր տոնով և կոպիտ կերպով սկսեց խոսել մեզ հետ, պահանջել վճարում և հայտարարել, որ եթե վճարումը չկատարվի, ինքը չի շարունակի երթուղին։ Մեզ մոտ կային ծանր իրեր, և մենք որևէ խոչընդոտ չէինք ստեղծում մյուս ուղևորների համար, սակայն վարորդի վարքագիծը անհարմար դրության մեջ դրեց ոչ միայն մեզ, այլև ավտոբուսում գտնվող մյուս քաղաքացիներին։

Հատկանշական է նաև, որ երբ փորձեցինք վարորդին բացատրել իրավիճակը և ուշադրություն հրավիրել նրա խոսելու տոնին, նա պատասխանեց. «Ես ոնց ուզում եմ, տենց էլ կխոսեմ»։ Այս արտահայտությունը վկայում է քաղաքացիների նկատմամբ անհարգալից վերաբերմունքի և ծառայողական էթիկայի նորմերի խախտման մասին։

Հավելյալ նշում եմ, որ հետագայում պարզվել է՝ մեր բանկային քարտից գանձվել է նաև երրորդ ուղևորատոմսի արժեքը։

Խնդրում եմ պարզաբանել.

• Ի՞նչ իրավունքներ և պարտականություններ ունի վարորդը նման իրավիճակներում։

• Արդյո՞ք վարորդն իրավասու է նման տոնով խոսել և նման արտահայտություններ թույլ տալ քաղաքացիների նկատմամբ։

• Ո՞վ է պատասխանատու վճարային համակարգի կամ սարքավորումների տեխնիկական խափանումների համար։

• Ի՞նչ միջոցներ են ձեռնարկվելու նման դեպքերի կրկնությունը բացառելու նպատակով»։

MediaHub-ը խնդրի հետ կապված դիմել է «Երևան ավտոբուս» ՓԲԸ-ի խոսնակ Գեղամ Ասատրյանին, որը հայտնել է, որ արդեն տեղյակ են դեպքից և զբաղվում են բողոքի ուսումնասիրությամբ։

«Բնականաբար, ֆեյսբուքյան գրառումը հրապարակվելուց անմիջապես հետո տեսել ենք։ «Երևան ավտոբուս» ՓԲԸ-ի տնօրենի հանձնարարությամբ մեր մասնագետներն այժմ ավտոբուսների տեսախցիկների միջոցով իրականացնում են նույնականացման աշխատանքներ։ Ուղևորի նույնականացման համար որոշ տվյալներ են անհրաժեշտ, այդ նպատակով գրել ենք ֆեյսբուքյան հարթակում, որտեղ հրապարակվել էր բողոքը, և սպասում ենք ուղևորի հեռախոսահամարին, որպեսզի կարողանանք 100 տոկոսանոց նույնականացում իրականացնել։ Մեր անվտանգության ծառայության աշխատակիցները, կարելի է ասել, 24/7 ռեժիմով հետևում են տեսագրություններին և ուսումնասիրում բոլոր բողոքները»,- նշել է Ասատրյանը։

Մեր հարցին, թե նման դեպքերում ինչ հետևանքներ կարող են լինել վարորդի համար, Ասատրյանը պատասխանեց.

«Այս պահին չեմ կարող ասել։ Համապատասխան բաժինը կուսումնասիրի դեպքը, և դրանից հետո որոշում կկայացվի։ Կան տարբեր կարգապահական տույժեր՝ բանավոր կամ գրավոր նկատողությունից մինչև աշխատանքից ազատում»։

Մարիաննա Արամյան