Русский
Ցեղասպանության թանգարանի տնօրեն Էդիտա Գզոյանի պաշտոնանկությունը շարունակում է մեծ արձագանք ստանալ մասնագիտական և հանրային շրջանակներում։ Կառավարության նիստից հետո իր ճեպազրույցի ընթացքում լրագրողի հարցին ի պատասխան Նիկոլ Փաշինյանը հաստատեց, որ Գզոյանի՝ պաշտոնից հեռացումը տեղի է ունեցել իր ցուցումով։
Ըստ հրապարակումների՝ պաշտոնանկության պատճառ կարող էր լինել այն, որ Գզոյանը Հայաստան այցելած ԱՄՆ փոխնախագահ Ջեյ Դի Վենսին նվիրել է Արցախի հիմնահարցին վերաբերող գիրք։
Թեմայի շուրջ MediaHub-ը զրուցեց ՀՑԹԻ նախկին տնօրեն Հայկ Դեմոյանի հետ, ով ընդգծեց, որ մինչ այժմ Գզոյանը հրապարակային հայտարարությամբ հանդես չի եկել և չի մեկնաբանել իր պաշտոնանկությունը։ Դեմոյանը հարցադրում է անում՝ հնարավոր չէ՞, որ Գզոյանն ինքը չի ցանկանում, որ իրեն «հերոսացնեն», և թեման քաղաքականացվի։
«Այն, ինչի մասին ես խոսում եմ, աղաղակող հանցագործություն է։ Նույնիսկ այն միջադեպից հետո, որ Էդիտա Գզոյանը Հայաստան այցելած ԱՄՆ փոխնախագահ Ջեյ Դի Վենսին նվիրել է Արցախի հիմնահարցին վերաբերող գիրքը, ոչ մի քաղաքական գործիչ չի հետաքրքվում, որ դա կարող է քաղաքական պայքարի ռեսուրս լինել՝ ցույց տալու, թե իշխանությունները ինչ են անում Ծիծեռնակաբերդի շուրջ։ Կա մեծ տաբու՝ այդ թեմային չանդրադառնալ»,- հայտնեց Դեմոյանը։
Նրա խոսքով՝ եթե պարզվի, որ Էդիտա Գզոյանը համաձայնել է աշխատել որպես փոխտնօրեն, ապա այն մարդիկ, ովքեր այսօր բարձրաձայն պաշտպանում են նրան, կարող են հայտնվել անհարմար իրավիճակում։
Նա նաև քննադատում է այն հանգամանքը, որ թանգարանի մի շարք աշխատակիցներ նամակներով, հարցազրույցներով փորձում են պաշտպանել Գզոյանին։
«Եթե պարզվի, որ Էդիտա Գզոյանը համաձայնվել է աշխատել որպես փոխտնօրեն՝ ապա այն մարդիկ, ովքեր այսօր բարձրաձայն պաշտպանում են նրան, կարող են հայտնվել անհարմար իրավիճակում»,– նշեց Դեմոյանը։
Նա նաև հիշեցրեց, որ Հայոց ցեղասպանության թանգարան-ինստիտուտի հոգաբարձուների խորհուրդը ձևավորվել է Փաշինյանի որոշմամբ և այնտեղ ընդգրկված են իշխանություններին լոյալ մարդիկ։ Դեմոյանի խոսքով՝ այդ կազմավորումը նպատակ ունի խուսափել որոշ խնդիրների բացահայտումից և բացառել անցանկալի անձանց նշանակումը ղեկավար պաշտոններում։
Ալիտա Եղիազարյան