Փոլ Ուոքերի եղբայրը չի ցանկանում մասնակցել հանգուցյալ դերասանի կերպարի՝ Բրայան Օ'Քոնների վերադարձին Universal ընկերության «Ֆորսաժ» ֆիլմաշարի հաջորդ ֆիլմում։

«2014 թվականին արհեստական ​​բանականություն գոյություն չուներ, ուստի նրանք կարող են դա անել», - ասել է Քոդի Ուոքերը «Entertainment Weekly»-ին։ ««Ֆորսաժ» ֆիլմաշարի նախորդ մասերից մնացել են տարիների ընթացքում չօգտագործված կադրեր։ Նրանք ոլորտի լավագույն մասնագետներն են և կարող են լուծել այդ խնդիրը»։

Նույնիսկ եթե «Ֆորսաժ» ֆիլմի ստեղծագործական խումբը չօգտագործի արհեստական ​​բանականություն, Քոդի Ուոքերը «շահագրգռված չէ» հանդես գալ որպես դուբլյոր 2028 թվականին նախատեսված «Fast Forever» («Արագ ընդմիշտ») ֆիլմում։ Նրա խոսքով՝ եզրափակիչ մասում կերպարի վերադարձի վերաբերյալ որոշումը պետք է կայացնի Փոլի դուստրը՝ Մեդոուն։

«Իմ դիրքորոշումն այն է, որ պետք է արվի այն, ինչ ցանկանում է Մեդոուն. չէ՞ որ դա նրա հայրն է», - ասել է Ուոքերը։ «Ես շահագրգռված չեմ կրկին դա անելով։ Ինձ դուր է գալիս, թե ինչպես նրա կերպարը հեռացավ ֆիլմաշարից։ Նրանք չսպանեցին նրան, չարեցին նման էժանագին քայլ։ Դա գեղեցիկ էր. [Բրայանը] զբաղված է իր երեխաների դաստիարակությամբ։ Բայց եթե նրանք ցանկանում են դա անել, եթե Մեդոուն կցանկանար տեսնել դա, ապա ինձ կամ Քալեբին դրա համար կարիք չունեն»։

Քոդի և Քալեբ Ուոքերներն ավելի վաղ փոխարինել էին Փոլին այն բանից հետո, երբ վերջինս 2013 թվականին «Ֆորսաժ 7»-ի նկարահանումների ընդմիջման ժամանակ մահացել էր վթարից։ Վիզուալ էֆեկտների օգնությամբ «Ֆորսաժ 7»-ն ավարտին էր հասցվել։