Քեմբրիջի համալսարանի գիտնականները ներկայացրել են դեղամիջոց, որը կարող է զգալիորեն նվազեցնել ուղեղի վնասվածքը կաթվածից հետո:
Մկների վրա կատարված փորձի ժամանակ արյան հոսքի վերականգնման ժամանակ ուղեղ ներմուծված թթվային մալոնատ (aDSM) կոչվող նյութը 60 տոկոսով կրճատել է վնասված հյուսվածքի ծավալը:
Ուսումնասիրության արդյունքները հրապարակվել են «Cardiovascular Research» ամսագրում:
Կաթվածից հետո հիմնական խնդիրներից մեկը ոչ միայն արյան հոսքի խցանումն է, այլև դրա արագ վերականգնումը: Երբ թթվածինը կրկին մտնում է վնասված հյուսվածք, բջիջներում շղթայական ռեակցիա է սկսվում, որը հանգեցնում է ազատ ռադիկալների արտազատման: Սա կարող է մեծացնել բորբոքումը և ոչնչացնել ԴՆԹ-ն՝ վատթարացնելով արդյունքը նույնիսկ հաջող թրոմբէկտոմիայի դեպքում, որը արյան մակարդուկը հեռացնելու ստանդարտ ընթացակարգ է:
Հետազոտողները պարզել են, որ վնասը առաջանում է սուկցինատ կոչվող նյութի օքսիդացումից: aDSM դեղամիջոցը խոչընդոտում է այս գործընթացը՝ թափանցելով արյուն-ուղեղային պատնեշը՝ լուծույթի թույլ թթվայնության պատճառով:
Հեղինակները նշել են, որ որքան փոքր է վնասված հյուսվածքի մակերեսը, այնքան մեծ է հիվանդի խոսքի, շարժման և ճանաչողական գործառույթների պահպանման հնարավորությունը: Մեթոդը փորձարկվում է «Camoxis Therapeutics» ստարտափի շրջանակներում. ապագայում այն կարող է օգտագործվել արյան հոսքի կտրուկ վերականգնման հետ կապված այլ վիճակների դեպքում, այդ թվում՝ սրտի կաթվածների և օրգանների փոխպատվաստման դեպքում: