Ամերիկայի հայկական համագումարը կոչ է արել ԱՄՆ նախագահ Դոնալդ Թրամփին ապահովել Բաքվում ապօրինի պահվող հայ գերիների անհապաղ ազատ արձակումը։
«Հայտարարելով Գազայում պատերազմի ավարտի և իսրայելցի պատանդների վերադարձի մասին, նախագահ Դոնալդ Ջ. Թրամփը հայտարարեց «ահաբեկչության և մահվան դարաշրջանի ավարտը և հավատքի, հույսի ու Աստծո դարաշրջանի սկիզբը»։
Ավելի լայն տարածաշրջանում խաղաղության ամրապնդման այս պատմական զարգացումից բացի, նախագահ Թրամփը նաև իր ուշադրությունը կենտրոնացրել է Հայաստանի և Ադրբեջանի միջև հակամարտության լուծման վրա: Թրամփի՝ Հայաստանի և Ադրբեջանի ղեկավարների հետ հանդիպման և օգոստոսի 8-ին Սպիտակ տանը երկու երկրների միջև խաղաղության համաձայնագրի նախաստորագրման ժամանակ նա խոստացավ պատանդների ազատ արձակման հարցը բարձրացնել Ադրբեջանի նախագահի հետ:
Մենք կոչ ենք անում նախագահ Թրամփին ապահովել Բաքվում գտնվող հայ քրիստոնյա պատանդների անհապաղ ազատ արձակումը:
Իսկական խաղաղության հասնել հնարավոր չէ, քանի դեռ պատանդները անարդարացիորեն պահվում են Բաքվում»,- հայտարարել են Ամերիկայի հայկական համագումարի համանախագահներ Օսկար Թաթոսյանը և Թալին Յակուբյանը։