Եկեղեցու շուրջ կրքերը շարունակվում են թեժանալ․ Նիկոլ Փաշինյանը «հանգիստ չի թողնում» եկեղեցուն և հոգևորականներին, նա պատրաստվում է այս կիրակի պատարագի մասնակցել Թալինի Սուրբ Աստվածածին եկեղեցում, մասնավորապես, Փաշինյանը գրել էր․ «Թալինի սբ. Աստվածածին եկեղեցում կմասնակցեմ Տեր Թադե Թախմազյանի ձեռամբ մատուցվող սուրբ և անմահ պատարագին, որտեղ կաղոթենք մեր բոլոր ընկած զինվորների հոգիների խաղաղության համար»։
MediaHub-ի տեղեկություններով՝ Տեր Թադե Թախմազյանի հարցը Մայր Աթոռի կարգապահական հարցերի հանձնախմբի օրակարգում է։
MediaHub-ի տեղեկություններով՝ շուտով կարգալույծ կլինի Տեր Թադե Թախմազյանը, Մայր Աթոռը շատ շուտով այդ որոշումը կիրականացնի։
Նշենք, որ այս հոգևորականը իր աջակցությունն է հայտնել Հովհաննավանքում կարգալույծ արված Ստեփան Ասատրյանին (նախկինում՝ Տեր Արամ), Տեր Թադեն նախօրեին Հովհաննավանքում մասնակցել է կարգալույծ քահանա Ստեփան Ասատրյանի մատուցած «պատարագին»։
MediaHub-ը գրել էր, որ մեր տեղեկություններով՝ առաջիկայում Փաշինյանը պլանավորում է փոխել իր հանդիպումների վայրերը՝ ամեն կիրակի ընտրելով տարբեր եկեղեցիներ՝ ընդլայնելով, թե՛ մասնակիցների շրջանակը, թե՛ գործընթացի տարածքը։ Վերջնական նպատակը, ըստ մեր աղբյուրների, կարող է լինել Գրիգոր Լուսավորիչ եկեղեցում մեծաքանակ հավաք կազմակերպելը և մինչև տարեվերջ, կամ գուցե հունվար ամսին՝ հասնել Վեհափառ Հայրապետի հեռացմանը։