Իրանում Ֆորդոյի ուրանի հարստացման գործարանը չի վնասվել, հայտարարել է Ատոմային էներգիայի միջազգային գործակալության ղեկավար Ռաֆայել Գրոսսին։
Նա նշել է, որ Իսրայելի կողմից իրանական օբյեկտներին վերջերս հասցված հարվածներից հետո տեսուչները որևէ վնաս չեն գրանցել։
Կառույցը մնում է գործակալության հսկողության տակ, և, «ամեն ինչ նորմալ է գործում»։
Իսրայելը սկսել է տասնյակ հազարավոր պահեստազորայինների զորահավաք, հայտարարել է երկրի զինված ուժերի Գլխավոր շտաբի պետ Էյալ Զամիրը։
Իրանը մեղադրել է Միացյալ Նահանգներին Իսրայելի հարվածներին մասնակցելու համար ու սպառնացել «պատասխանատվությամբ»։
«Իրանի դեմ սիոնիստական ռեժիմի ագրեսիվ գործողությունները չէին կարող իրականացվել առանց Միացյալ Նահանգների համակարգման և թույլտվության։ Հետևաբար, ԱՄՆ կառավարությունը` որպես այս ռեժիմի գլխավոր աջակից, նույնպես պատասխանատու կլինի սիոնիստական ռեժիմի արկածախնդրության վտանգավոր հետևանքների համար», - հայտարարել է Իրանի արտաքին գործերի նախարարությունը։
Իսրայելի բանակը հայտարարել է Իրանի արևմուտքում հակաօդային պաշտպանության օբյեկտների վրա լայնածավալ ավիահարվածների ավարտի մասին։