Կիվիի օգտագործումը վտանգավոր է որոշ մարդկանց համար, «ՌԻԱ Նովոստի»-ի հետ զրույցում զգուշացրել է գաստրոէնտերոլոգ Ելենա Պեխոտինան։
Պեխոտինայի խոսքով՝ կիվին բարձր թթվային սնունդ է, ուստի այն կարող է առաջացնել այրոց և ստամոքսի լորձաթաղանթի գրգռում։ Այս խնդիրը հատկապես սուր է գաստրիտով և ստամոքսի խոցով տառապող մարդկանց մոտ։ Ավելին, կիվին կարող է ալերգիկ ռեակցիաներ առաջացնել էկզոտիկ մրգերի նկատմամբ գերզգայունություն ունեցող մարդկանց մոտ։
Մասնագետը նշել է, որ կիվին պարունակում է մեծ քանակությամբ վիտամին C, վիտամին K, կալիում և օրգանական թթուներ, որոնք ամրացնում են արյան անոթները և նպաստում երկաթի կլանմանը։ Բժիշկը վստահեցրել է, որ այս միրգը օգտակար է երկաթի դեֆիցիտային անեմիայի, հիպովիտամինոզի և թուլացած իմունային ֆունկցիայի դեպքում։
Առողջությանը վնաս չպատճառելու համար գաստրոէնտերոլոգը խորհուրդ է տվել չափավորություն պահպանել կիվի ուտելիս (օրական ոչ ավելի, քան երկու միրգ)։