ԱՄՆ նախագահ Դոնալդ Թրամփը «Truth Social» սոցցանցում հայտարարել է, որ օգոստոսի 1-ից Միացյալ Նահանգները Հնդկաստանի նկատմամբ կսահմանի 25% մաքսատուրք։
Նրա խոսքով՝ Միացյալ Նահանգները հսկայական առևտրային դեֆիցիտ ունի Հնդկաստանի հետ, որ Դելին ռազմական տեխնիկա և էներգիա է գնում Ռուսաստանից, և որ «սա անընդունելի է»։
«Նրանց մաքսատուրքերը չափազանց բարձր են՝ աշխարհում ամենաբարձրերից մի քանիսը, և նրանք ունեն ամենաբարդ և տհաճ ոչ մաքսատուրային առևտրային արգելքները, քան որևէ այլ երկիր։ Բացի այդ, նրանք միշտ իրենց ռազմական տեխնիկայի մեծ մասը գնել են Ռուսաստանից և ռուսական էներգիայի ամենամեծ գնորդն են Չինաստանի հետ միասին», - գրել է Թրամփը։
Նրա խոսքով՝ Հնդկաստանը բախվում է ոչ միայն մաքսատուրքի, այլև «վերը նշված բոլորի համար տուգանքների»։
Ապրիլին, երբ Թրամփը հայտարարել էր տասնյակ երկրների համար մաքսատուրքերի մասին, Դելիին սպառնացել էր 26% մաքսատուրքով։ Մաքսատուրքերի ներդրումը երկրների մեծ մասի համար հետաձգվել էր մինչև օգոստոսի 1-ը։