ԱՄՆ նախագահ Դոնալդ Թրամփը դժգոհ է Իսրայելի վարչապետ Բենիամին Նեթանյահուի գործողություններից, ով հրադադարի շուրջ բանակցությունների փոխարեն առաջնահերթություն է տալիս պաղեստինյան «Համասի» դեմ ռազմական գործողություններին, հայտնել է «The Wall Street Journal»-ը՝ հղում անելով աղբյուրներին:

Թրամփի նյարդայնությունը զգալիորեն աճել է Կատարին Իսրայելի հարվածից հետո: Իր խորհրդականների հետ զրույցում ամերիկացի առաջնորդը կարծիք է հայտնել, որ Նեթանյահուն ծաղրում է իրեն:

Սակայն ԱՄՆ նախագահը ձեռնպահ է մնում Իսրայելի դեմ կոշտ միջոցներ ձեռնարկելուց: Հրատարակությունը դա բացատրում է Թրամփի և Նեթանյահուի միջև լավ անձնական հարաբերություններով: ԱՄՆ մի քանի պաշտոնյաներ «The Wall Street Journal»-ին ասել են, որ ԱՄՆ ղեկավարը հպարտանում է Իսրայելի վարչապետի հետ իր ջերմ հարաբերություններով և չի ցանկանում դրանք փչացնել: Ամերիկացի առաջնորդը նաև հավատարիմ է մնում Իսրայելի և Սաուդյան Արաբիայի միջև դիվանագիտական ​​հարաբերություններ հաստատելուն և դա համարում է դիվանագիտական ​​​​գլխավոր նպատակ: