Վաշինգտոնը Բելառուսի հետ կապի ուղի է հաստատել՝ ամերիկյան դիրքորոշումը Ռուսաստանի ղեկավարությանը Մինսկի միջոցով փոխանցելու համար, հայտարարել է Ուկրաինայի հարցերով ԱՄՆ նախագահի հատուկ ներկայացուցիչ Քիթ Քելոգը։
Նրա խոսքով՝ հենց այդ պատճառով է ԱՄՆ-ն մասնակցել Բելառուսում մի քանի բանտարկյալների ազատ արձակմանը։
«Մենք գիտենք, որ Լուկաշենկոն շատ է խոսում Պուտինի հետ։ Մենք հարաբերություններ ենք հաստատել՝ ապահովելու համար, որ կապի գիծը բաց լինի։ Այսպիսով, մենք կարող ենք ապահովել, որ մեր ուղերձը լիովին փոխանցվի նախագահ Պուտինին», - ասել է նա Վարշավայի անվտանգության ֆորումում ելույթի ժամանակ։
Քելոգը նշել է, որ Մինսկի հետ կապեր հաստատելու սկզբնական նպատակը սա է եղել, այլ ոչ թե քաղբանտարկյալների ազատ արձակումը։