Հայաստանի Արտաքին գործերի փոխնախարար Պարույր Հովհաննիսյանը այսօր խորհրդարանում լրագրողների հետ ճեպազրույցի ժամանակ ասաց, որ Ալիեւի տարածքային պահանջները «խաղաղության պայմանագրի» խնդիրներից մեկն է։
Երեկ Նիկոլ Փաշինյանը Կառավարության նիստի ժամանակ հայտարարեց, որ Հայաստանը ստացել է Ադրբեջանի՝ «խաղաղության պայմանագրի» իր առաջարկները, բայց չմանրամասնեց, թե ի՞նչ նոր առաջարկներով կամ փաթեթում ի՞նչ փոփոխություններով է հանդես եկել Ալիեւը։
««Խաղաղության պայմանագրի» շուրջ աշխատանքները շարունակվում են։ Դա տեխնիկական պրոցես է, ներկայացնում ենք Հայաստանի շահերը, Լեռնային Ղարաբաղի հայության, մարդու իրավունքների անվտանգության հարցերը եւ այլն։ «Խաղաղության պայմանագրի» հիմնական խնդրահարույց մասը Բաքվի հռետորաբանությունն է, որը ոչ մի բանով չի նպաստում թե՛ պայմանագրի աշխատանքներին, թե՛ տարածաշրջանի կայունացմանը»,-ասաց ԱԳ փոխնախարարը։
Հովհաննիսյանը՝ հռետորաբանություն ասելով, նկատի ուներ Ալիեւի տարածքային պահանջները՝ Հայաստանի նկատմամբ, այդ թվում նաեւ «Զանգեզուրի միջանցքը»։
Լրագրողները հետաքրքրվեցին՝ ինչպե՞ս են իշխանությունները բավարարում Ալիեւի պահանջները, երբ Նիկոլ Փաշինյանը հայտարարում է, որ Բաքուն հիմնականում «ջնջում» է Հայաստանի ուղարկած «խաղաղության պայմանագրի» իր տարբերակն ու կետերը.
«Առաջարկներ են ներկայացվում երկու կողմից էլ, դրանք կա՛մ մերժվում են, կա՛մ հաստատվում։ Սա տեխնիկական պրոցես է, որն ընթանում է դեռեւս»,-պատասխանեց նա։
ԶԼՄ ներկայացուցիչները հարցրին նաեւ՝ արդեն հստա՞կ է՝ «խաղաղության պայմանագրում» Լեռնային Ղարաբաղին վերաբերող հարցեր կան, թե ոչ։
«Դեռեւս մենք այն փուլում չենք, որ հստակ պատասխան տանք այդ հարցին»,-նշեց ԱԳ փոխնախարարը։
Անդրադառնալով Հայաստանի՝ ՀԱՊԿ գլխավոր քարտուղարի տեղակալի քվոտայից հրաժարվելու որոշմանը, լրագրողները հետաքրքրվեցին՝ ինչո՞ւ կառույցի գլխավոր քարտուղարն այդ որոշումից հետո շտապեց գալ Հայաստան, գնալ հայ-ադրբեջանական շփման գիծ։ Հայաստանի արտաքին գերատեսչության ներկայացուցիչն ասաց, որ կառույցի նոր գլխավոր քարտուղարի մեր երկիր ժամանումը ծրագրավորված այց էր։
«Նոր էր նշանակվել, պետք է գար, ծանոթանար իր գործընկերների հետ»։
Լրագրողները հետքրքրվեցին նաեւ, թե ինչպե՞ս է Հայաստանի ԱԳՆ-ն վերաբերում ռուսական կողմի, մասնավորապես՝ Մարիա Զախարովայի՝ Փաշինյանի հասցեին հնչող քննադատական հայտարարություններին։ Հովհաննիսյանն ասաց, որ մարտի 20-ին կայանալիք Միրզոյան-Լավորվ հանդիպումը վկայում է աշխատանքային մթնոլորտում հուզող բոլոր հարցերը քննարկելու երկկողմ պատրաստականության մասին։
Մանրամասն՝ տեսանյութում: