Միանշանակ համոզված եմ, որ եթե Ալեն Սիմոնյանը ցանկանար Արցախ գալ, կգար մինչեւ դեկտեմբեր։ Մենք պահանջում էինք, որ միջխորհրդարանական կապը պահվի եւ համատեղ նիստեր անցկացվեն։ Ալեն Սիմոնյանն ամեն անգամ ասում էր՝ այո, բայց երբեւիցե գործնական քայլեր չէր անում՝ նիստն անցկացնելու համար․ MediaHub-ի հետ զրույցում ասում է Արցախի ԱԺ «Արդարություն» խմբակցության անդամ Դավիթ Գալստյանը։

Ալեն Սիմոնյանի հայտարարությունից անցել է 2 օր, սակայն Հայաստան-Արցախ միջխորհրդարանական հանձնաժողովի առցանց հանդիպում այդպես էլ տեղի չի ունեցել։ Երբ ԱԺ «Հայաստան» խմբակցության անդամ Արծվիկ Մինասյանը ԱԺ նախագահ, Հայաստան-Արցախ միջխորհրդարանական հանձնաժողովի նախագահ Ալեն Սիմոնյանից հետաքրքրվեց, թե պատրաստվո՞ւմ է, արդյոք, նիստ անցկանացնել Արցախի խորհրդարանի պատգամավորների հետ, Սիմոնյանը նշեց, որ հանդիպում նախատեսված է եղել դեռեւս սեպտեմբերին, այժմ միջանցքի փակման պատճառով դա իրագործել չի ստացվի։ Այդուհանդերձ, ՔՊ-ական Սիմոնյանը նշեց, որ հավանական է համարում առցանց հանդիպման տարբերակը։

«Առցանց հանդիպման տարբերակը կարելի է քննարկել: Եթե նման հնարավորություն տեսնում են նաեւ Արցախի մեր գործընկերները, ապա ինչո՞ւ ոչ»,-պատասխանեց ԱԺ խոսնակը։

Գալստյանը շեշտում է՝ որեւէ խոչընդոտի չէր հանդիպի Ալեն Սիմոնյանը, եթե նրա մոտ ցանկություն լիներ թեկուզ այսօր տեսակապով հանդիպել Արցախի պատգամավորների հետ։

«Երկու օր առաջ արված հայտարարությունը հերթական սուտն էր՝ ժողովրդին շեղելու համար։ Հայաստանի խորհրդարանի եւ Արցախի խորհրդարանի միջեւ չկա շփում։ Օրվա իշխանությունները ստորագրել են մի փաստաթուղթ, որով հայ ազգի շահերը ներկայացնելու պարտավորություն են ստանձնել, մինչդեռ վաղուց են հրաժարվել Արցախի շահերը ներկայացնելուց, դա արել են դեռեւս 2018թ․-ին»,-ասաց նա։

Խորհրդարանի նիստներին չխոսելով արդեն 38 օր շրջափակման մեջ հայտնված Արցախից ու արցախահայությունից, այդպիսով ՔՊ-ականները, ըստ Գալստյանի, փորձում են Ադրբեջանի քաղաքականությունը տարածել Արցախում․

«Այլ կերպ ասած, նրանց քաղաքականությունը համահունչ է Ադրբեջանի վարած քաղաքականությանը»։

Գիշերը ադրբեջանցիները կրկին անջատել են Արցախը սնուցող միակ գազատարը։ Գալստյանի խոսքով՝ Արցախի տների 70 տոկոսը գազով էր ջեռուցվում, դիզվառելիքի խնդրի պատճառով գազով էին շահագործվում նաեւ մեքենաները, աղետ է՝ բոլոր ուղղություններով։ Այս ֆոնին երեկ ադրբեջանցիները թույլ էին տվել, որպեսզի Գորիսում մնացած երեխաները վերադառնան Արցախ։ Զուգահեռ մամուլում տեղեկություն տարածվեց, թե Արցախի նախագահ Արայիկ Հարությունյանը մոտ 2 օր առաջ հանդիպում է ունեցել ադրբեջանցիների հետ։ Գալստյանից հետաքրքրվեցինք՝ արդյո՞ք հավանական է համարում, որ նման հանդիպում իսկապես եղել է եւ որքանով կապ ունի այս իրողությունը մյուսի հետ։

«Ես հստակ չգիտեմ՝ այդպիսի հանդիպում եղել է, թե ոչ, եւ որքանով է համատասխանում մամուլում գրվածը իրականությանը։ Երբ Ռուսաստանի քաղաքացիներին տեղափոխել են Հայաստան, նույն ավտոմեքենաներով Գորիսում մնացած երեխաներին են բերել Արցախ։ Այս պրոցեսը տեղի է ունեցել ռուս խաղաղապահների ավտոմեքենաներով։ Հետեւաբար, չենք կարող համարել, որ ադրբեջանցիները մարդասիրական քայլ են արել։ Բազմաթիվ գրառումներ կան այն մասին, թե ինչպես են ադրբեջանցիները ներխուժել ավտոբուսի մեջ ու հոգեբանական ճնշումների ենթարկել երեխաներին»,-հիշեցրեց պատգամավորը։

Արցախի ՄԻՊ Գեղամ Ստեփանյանն էր գրել, որ Շուշի-Քարինտակ հատվածում՝ ճանապարհի շրջափակված մասում, որտեղ տեղակայված են «էկոակտիվիստեր» ձեւացող ադրբեջանական կառավարական գործակալները եւ նրանց սպասարկող լրագրողները, մեքենան կանգնեցվել է ադրբեջանցիների կողմից։ Այնուհետև, մեքենային են մոտեցել քաղաքացիական հագուստով դեմքերը փակած 10-15 ադրբեջանցիներ՝ տեսախցիկներով, նրանցից ոմանք ներխուժել են մեքենա եւ նկարահանել մեքենայում գտնվող երեխաներին։ Ադրբեջանցիների սադրիչ գործողությունների հետևանքով մեքենայում իրարանցում է առաջացել, որի հետևանքով երեխաներից մեկը ուշաթափվել է։

Լիա Սարգսյան