Երեկ, երբ իմացան, որ Գորիսի երեխաների խումբն Արցախ է վերադարձել, մի վայրկյանում իրերը հավաքեցին, կանգնեցին: Ասում եմ՝ ի՞նչ եք անում, ասում են՝ դե որ իրենք գնացել են, մենք էլ կգնանք։

Այս մասին MediaHub-ի հետ զրույցում պատմեց Երևանում մնացած արցախցի երեխաների ուսուցչուհին՝ Անահիտ Գաբուզյանը։

14 արցախցի երեխաներ արդեն 38 օր է Երևանում են, հնարավորություն չունեն տուն վերադառնալու, քանի որ Լաչինի միջանցքն ադրբեջանցիները ապօրինի կերպով արգելափակել են։ Երեխաները հաճախում են Երևանի Չայկովսկու անվան երաժշտական միջնակարգ մասնագիտական դպրոց։

«Իրավիճակը շատ վատ է, մի կերպ համոզում, զոռով տանում ենք դպրոց, չեն ուզում գնան, ամեն առավոտ մեկի ականջն է ցավում, մյուսի՝ գլուխը, երրորդի փորը, պատճառներ են ստեղծում, որ դպրոց չգնան»,- ասաց Անահիտ Գաբուզյանը, հավելելով, որ երեխաներն անընդհատ ասում են, որ իրենց քաղաք են ուզում գնալ, դպրոց, ընկերների մոտ։ Նրա խոսքով, երեխաները չեն հարմարվում նաև Երևանի դպրոցի իրենց նոր դասընկերների հետ, բայց շարունակում են աշխատանքներ տանել, համոզել երեխաներին։

«Արդեն 38 օր է կտրված են ընտանիքից, իրենց ասում եմ՝ այ մարդ, Արցախում սով է, բան չկա ուտելու, գազն էլ են անջատել, լույս չկա, էնա էստեղ ապրում եք էլի, ամեն ձևի խոսում եմ․․․Ասում են՝ ոչինչ մենք առանց լույս, առանց գազ, առանց ամեն ինչի մեր ծնողների հետ ենք ուզում լինել»,- նշեց ուսուցչուհին, հավելելով, որ երեխաներին Երևանում պահելն ավելի է դժվարացել, իսկ Գորիսի երեխաների խմբի վերադարձից հետո էլ՝ հատկապես։

Արցախցի 14 երեխաները շարունակում են մնալ Երևանի հյուրանոցներից մեկում, անընդհատ սպասելով այն լուրին, որ հաջորդ վերադարձող խումբը իրենք կլինեն ։ Անահիտ Գաբուզյանը նշում է, որ իրենց վերադառնալու հետ կապված տեղեկատվություն չունեն, իրենց ոչինչ չեն ասում, իսկ այն մասին, որ Գորիսի երեխաները վերադարձել են Արցախ՝ լուրերից են իմացել։

Նշենք, որ երեկ ռուս խաղաղապահների միջնորդությամբ 16 երեխաներ Հայաստանից տեղափոխվել են Արցախ՝ միանալով իրենց ընտանիքներին։

Շուշանիկ Միսկարյան