Սուրբ Գրիգոր Լուսավորիչ ԲԿ-ի նույն բաժանմունքի բուժաշխատողներն ահազանգել են MediaHub.am լրատվականին, որ մի շարք աշխատողների՝ բուժաշխատողների, բժիշկների՝ ընդհանուր մոտ 10-12 հոգու, ապօրինի կերպով ազատել են աշխատանքից։

Տվյալ բուժկենտրոնի աշխատակիցներից մեկը ներկայացրեց, որ իրենք եղել են գրանցված աշխատողներ։ Երբ հիվանդանոցը վերապրոֆիլավորվել է՝ հարմարեցվելով կորոնավիրուսային կենտրոնի, այդ ժամանակ ևս աշխատել են բուժկենտրոնում։

Մեզ հետ զրույցում բուժքույրերից մեկը նշեց․
«COVID-ից հետո մեզ բոլորիս ասացին` քանի որ հիվանդանոցը կրկին պետք է վերապրոֆիլավորվի իր նախկին կարգավիճակին, ամբողջ անձնակազմը պետք է ազատման դիմում գրի՝ կրկին վերականգնվելու հիմքով։ Դիմումը գրվել է մայիսի 2-ին ամբողջ անձնակազմի կողմից։ Մենք նշել ենք դիմում գրելու ամսաթիվը, սակայն քանի որ աշխատանքից ազատվելը չի եղել մեր կամքով, մենք չենք նշել մեզ ազատելու ամսաթիվ։

Մայիսի 19-ին մեզ կանչեցին հիվանդանոց՝ նշելով, որ մենք աշխատանքից ազատված ենք՝ պատճառաբանելով՝ հանձնաժողովը որոշել է, որ մենք մեր գիտելիքներով չենք համապատասխանում տվյալ աշխատանքին»,- ասաց հիվանդանոցի բուժքույրը։
Նա նշեց, որ իրենք պատճառաբանություն են պահանջել՝ հասկանալու՝ ինչի հիման վրա են եկել այդ եզրակացության, որ վերջիններս չեն համապատասխանում իրենց աշխատանքին, եթե չի եղել գիտելիք ստուգող որևէ թեստավորում, հարցազրույց, կամ վատ աշխատանքի համար երբևէ տրված նկատողություն. նրանց որևէ հստակ պատասխան չի տրվել։

«Բաժնի վարիչը մեղքը գցում է փոխտնօրենի վրա, փոխտնօրենը՝ բաժնի վարիչի, նա էլ իր հերթին՝ կադրերի վարիչի»,- հավելեց նա։
Սուրբ Գրիգոր Լուսավորիչ ԲԿ-ի աշխատակիցները դիմել են իրավապահ մարմիններին։
«Մենք հիմա ծանուցման ենք սպասում, որ բոլոր տուժողներով դիմենք այս գործի համար, որ ազատման դիմումները հիմք չընդունեն, իսկ այդ ընթացքում մենք կարողանանք պաշտպանել մեր իրավունքները»,- հավելեց հիվանդանոցի բուժաշխատողը։
MediaHub.am-ը կապ հաստատեց նաև Սուրբ Գրիգոր Լուսավորիչ հիվանդանոցի հանրային կապերի համակարգող Աիդա Կարապետյանի հետ՝ հասկանալու ի վերջո աշխատակիցներին աշխատանքից հեռացնելու պատճառը որն է․
«COVID համավարակի ավարտով ու կլինիկայի վերաբացումով պայմանավորված՝ աշխատանքային հարաբերություններում որոշակի փոփոխություններ են տեղի ունեցել։ Այժմ հիվանդանոցը վերապրոֆիլավորվում է, որոշակի մասնագետների հետ այս ընթացքում աշխատանքային պայմանագրերի լուծում է տեղի ունենում։ Աշխատանքից ազատման դիմումներ գրել են բոլորը և մի մասը, այո, տեղեկացվել է՝ վերապրոֆիլավորումով պայմանավորված՝ որոշակի աշխատակիցների հետ պայմանագրի երկարացում տեղի չի ունենա»,- ասաց նա՝ հավելելով, որ այդ աշխատակիցներին հրավիրել են համապատասխան բաժին՝ ծանոթանալու իրենց ազատման հրամանին, սակայն արդեն իսկ աշխատանքից ազատված աշխատակիցները հրաժարվել են վերցնել իրենց օրինակները։
«Մեր համապատասխան բաժինները՝ օրենքի պահանջին համաձայն, այդ օրինակներն ուղարկել են վերջիններիս հաշվառման հասցեներով»,- հավելեց նա։
Հիվանդանոցի նախկին աշխատակիցները մեզ հետ զրույցում պնդում էին, որ իրենց խոստացել են հիվանդանոցը վերապրոֆիլավորելուց հետո կրկին աշխատանքի ընդունել, այս առնչությամբ Աիդա Կարապետյանը նշեց, որ բոլորին աշխատանքի ընդունելու խոստումներ չէր կարող տրված լինել, քանի որ, համավարակով պայմանավորված, հաստիքների փոփոխություններ են տեղի ունեցել և, հետևաբար, համավարակից հետո պետք է դրանք վերանայվեն։
Նախկին աշխատակիցների՝ իրավապահ մարմիններին դիմելու մասով հիվանդանոցի հանրային հետ կապերի համակարգողը նշեց, որ եթե իրենք վստահ են, որ իրենց նկատմամբ ապօրինություն է տեղի ունեցել, ապա կարող են շարունակել, սական վերջինս համոզմունք հայտնեց, որ ամեն ինչ եղել է օրինականության սահմաններում։

Մերի Գևորգյան