Բրենդը ստեղծվել է մի նպատակով՝ Հայաստանը ներկայացնել միջազգային շուկայում, բացահայտել Հայաստանի զբոսաշրջային առաջարկները, հնարավորություն է տալիս ճանաչելի դարձնել երկիրը։
Այս մասին MediaHub.am-ի հետ զրույցում ասաց ՀՀ զբոսաշրջության կոմիտեյի խոսնակ Գայանե Այվազյանը՝ հավելելով․

«Ներկայացված բրենդն իրենից ներկայացնում է հաղորդակցման լեզու, այն վիզուալ տարրերի համակարգ է, որտեղ պատկերանիշը՝ լոգոն, հանդես է գալիս տառերի ձևով։ Այս նպատակով զրոյից ստեղծվել է տառատեսակ, հենց Հայաստանի զբոսաշրջային բրենդի համար»,- ասաց նա։
Հարցին, գունային ներկապնակի հիմքում գաղափարի ո՞ր բաղկացուցիչն է, Գայանե Այվազյանը պատասխանեց․
«Ներկապնակի հիմքում 4 ուղղություններ կան, քանի որ կոմիտեն աշխատում է 4 ուղղություններով, երկիրը ներկայացնելուց հաշվի է առնվել դրանք։
Մշակութային, գաստրո գինի, բնություն, արկածային, քանի որ ՀՀ-ն հետաքրքիր է նաև որպես արկածային ուղղությամբ։ Այդ 4 ուղղությունների հիման վրա մշակվել է գունային գամմա, որոնք հենց դիզայներների կողմից են մշակվել»,-նշեց նա։
Հարցին՝ ըստ նրա ինչո՞վ է պայմանավորված, որ բազմաթիվ քաղաքացիների մոտ մեծ զայրույթ է հարուցել տեսահոլովակը, ովքեր պատճառաբանում էին, որ բառերն ավելի շատ են, քան պատկերները և վիզուալ առումով անհասկանալի է, Գայանե Այվազյանը նշեց․
«Չգիտեք՝ ինչու մարդիկ դա ընդունել են պրոմո հոլովակ, որը ներկայացնում է Հայաստանը, սակայն դա պրոմո հոլովակ չէ, այլ բրենդ մանիֆեստ է, այսինքն՝ բրենդը ներկայացվում է անիմացիայի տեսքով։ Տեսահոլովակը վերաբերում է բրենդին և նպատակ չուներ ներկայացնելու Հայաստանի տեսարժան վայրերը։ Սա չի ներկայացվելու մարքեթինգային արշավների ժամանակ, երկիրը գովազդելու համար, նրա նպատակը միայն բրենդը ներկայացնելն է։ Այսօր ՀՀ-ում առաջին անգամ ստեղծվել է բրենդ, որն իրենից ամբողջական կոմունիկացիա է ներկայացնում, ինչը շատ տարբերվում է նախորդ տարիներին ստեղծված նմանատիպ աշխատանքներից»,- հավելեց Այվազյանը։
Հարցին՝ տեսահոլովակի համար ֆինանսավորումը ի՞նչ եղանակով է իրականացվել և ինչքան է նախատեսվել, վերջինս պարզաբանեց․
«Բրենդը ստեղծվել է «Նորարարական տուրիզմի և տեխնոլոգիաների զարգացում Հայաստանի համար» ծրագրի շրջանակներում, որին աջակցում է Եվրոպական միությունն ու Գերմանիայի Դաշնային Հանրապետությունը, այս առումով, թե բյուջեն որքան է կազմել, իրավասու եմ ասել այն ժամանակ, երբ կունենամ ֆինանասավորողների աջակցությունը, եթե սա լիներ պետական բյուդջեյի հաշվին, մենք անպայման կհրապարակեինք»,- իր խոսքը եզրափակեց Զբոսաշրջության կոմիտեյի հասարակության հետ կապերի պատասխանատուն։

Մերի Գևորգյան