Արցախի ժողովրդի ֆիզիկական գոյությունը վտանգի մեջ է, վտանգված է մեր երեխաների կյանքն ու առողջությունը, խնդրում եմ՝ նայեք այս հրապարակում հավաքված մարդկանց աչքերին ու զգացեք ձեզ փոխանցվող պատասխանատվությունը․ MediaHub-ի հաղորդմամբ՝ դիմելով հայ ժողովրդին եւ Հայաստանի Հանրապետությանը, Ստեփանակերտի Վերածննդի հրապարակում ասաց Արցախի պետնախարար Գուրգեն Ներսիսյանը։
«Այս հրապարակում հավաքված են մարդիկ, ովքեր իրենց տառապանքների, կյանքի գնով անում են ամեն ինչ, որպեսզի դուք, աշխարհի որ կետում էլ լինեք, Արցախի անունը լսելիս գլխիկոր չմնաք, գետինը չմտնեք։ Հրապարակում կանգնած են մարդիկ, ովքեր ուզում են Գանձասար, Ամարաս եւ Արցախ պահել, որպեսզի դուք, որտեղ էլ լինեք հպարտանաք, որ Գանձասար, Ամարաս ու Արցախ ունենք։ Լսե՛ք այս խոսքերը եւ որոշեք հետագա անելիքները, ձեր խոսքի եւ այս հրապարկում կանգնած մանուկի ու ավագի հանդեպ ունեցած պատասխանատվության զգացումի ձեր չափով ու ընկալմամբ»,-հայտարարեց նա։
Դիմելով Ռուսաստանի Դաշնությանն ու ռուս ժողովրդին, Արցախում խաղաղապահ առաքելություն իրականացնող զինվորականներին, Գուրգեն Ներսիսյանն ասաց․
«Վերջին տարիներին ստիպված ենք եղել համատեղ բազմաթիվ խնդիրների միջով անցնել, հասկացել ենք, կռահել ենք բազմաթիվ գործընթացներ, երբեմն փորձել ենք քիչ խոսել՝ ձեզ հավելյալ խնդիրներից ու սուր իրավիճակներից հեռու պահելու համար։ Հիմա համոզված ենք, որ ձեր համար եւս իրավիճակը օրհասական է, ձեր աչքի առաջ Արցախի ժողովուրդը անցել է ծանրագույն խնդիրների միջով եւ հիմա այդ խնդիրները ստացել են առավել սուր պատկեր»։
Ռուսական կողմին ԱՀ պետնախարարը խնդրեց ապահովել Արցախի ժողովրդի անվտանգությունը, կատարել նոյեմբերի 9-ի հայտարարության պայմանավորավածությունը, ապաշրջափակել Արցախը Հայաստանին կապող միջանցքը։
Գուրգեն Ներսիսյանը դիմեց նաեւ միջազգային հանրությանը՝ պահանջելով չլռել:
Հիշեցնենք, որ Լաչինի միջանցքի ապաշրջափակման պահանջով Ստեփանակերտի Վերածննդի հրապարակում մեկնարկել է համաժողովրդական շարժում, որին մասնակցում են նաեւ Արցախի իշխանությունները, այդ թվում՝ Արայիկ Հարությունյանը։
Մանրամասն՝ տեսանյութում