Ուկրաինայի ուժերը հարված են հասցրել Սև ծովի «Չեռնոմորնեֆտեգազ» ձեռնարկության հորատման 3 հարթակների։ Ղրիմի ղեկավար Սերգեյ Աքսյոնովը «Россия 24» հեռուստաալիքի եթերում հայտնել է, որ 3 հորատման հարթակներում ավելի քան հարյուր մարդ գտնվել. փոխանցում է Interfax գործակալությունը։

«Հարված է հասցվել երեք աշտարակի, որոնց վրա եղել է 109 մարդ, 21 մարդ արդեն տարհանվել է»,- ասել է նա։

Ըստ Աքսյոնովի՝ ամենաուժեղ հարվածի տակ է հայտնվել առաջին աշտարակը։

«Այնտեղ եղել է 12 մարդ, նրանցից հինգը վիրավորվել է, մնացածի որոնողական աշխատանքները շարունակվում են»,- ասել է նա։

Աքսյոնովը հավելել է, որ Ղրիմ գազամատակարարումը չի խաթարվել։ Նա ընդգծել է, որ թերակղզին ունի մայրցամաքային խողովակ, որը առավելագույն բեռնվածության դեպքում կարող է մատակարարել մինչև 4 միլիարդ խորանարդ մետր գազ։

Դաշնային խորհրդի՝ Ղրիմը ներկայացնող անդամ Օլգա Կովիտիդին հայտնել է, որ Ուկրաինայի հրթիռային հարվածը վնասել է «Չեռնոմորնեֆտեգազ» ձեռնարկության երեք հարթակ։

«Առաջին հարվածը հասցվել է առաջին հարթակին ժամը 08:37-ին։ Այնտեղ աշխատող 12 մարդկանցից 5-ը տարհանվել է», - ասել է նա Interfax-ին:

Կովիտիդին նշել է, որ ավելի ուշ հարված է հասցվել ևս երկու հարթակի։ Բայց այնտեղ, ըստ նրա, քանդվել են միայն աշտարակները, տուժածներ չկան։ Աշխատողները պատրաստվում են տարհանման։ Առաջին հարթակի տուժածներին տարհանել են ուղղաթիռներով։

«Խողովակների գազը բաց է թողնվել: Արդյունահանումը ժամանակավորապես դադարեցվել է։ Չեն եղել այնպիսի աղետալի հետևանքներ, ինչպիսիք կարող էին լինել»,- ասել է Կովիտիդին:

«Չեռնոմորնեֆտեգազ» պետական ունիտար ձեռնարկությունը շահագործում է ածխաջրածնային հանքավայրերը սևծովյան շելֆում և Ազովի ծովի ջրերում, ինչպես նաև Ղրիմի թերակղզու ցամաքային մասում։ Ընկերությունը զբաղվում է նավթագազային հանքավայրերի որոնմամբ և մշակմամբ, ապահովում է բնական գազի և նավթամթերքի արդյունահանումը, փոխադրումը և պահպանումը։