Վաղը Հայաստանի Հանրապետությունը տոնում է Հայոց բանակի կազմավորման 31-ամյակը։ 

Բանակի տոնի նախաշեմին, խաղաղ պայմաններում մեր երկիրը կորցրեց 15 ժամկետային զինծառայող՝ զինվորական կացարանում տեղի ունեցած ողբերգական հրդեհի հետեւանքով։ Այսօր արդեն կացարանի հրդեհի գործով 2 ամիս ժամկետով կալանավորվեց թիկունքի պետը։ 

Արդյո՞ք իշխանությունը քաղաքական պատասխանատվություն կկրի զոհերի համար ու պաշտոնանկ կանի ՊՆ նախարար Պապիկյանին. գրող Գուրգեն Խանջյանը բացառում է։ 

«Բոլորս էլ սիրում ու հարգում ենք մեր բանակը, մյուս կողմից՝ վարկաբեկում են։ Ուռա ասել չեմ կարող, ասեմ՝ վարկաբեկում են՝ դուխից կգցեմ, չեմ կարող։ Ի՞նչ ասեմ։ Թե մի գործողություն պիտի անենք, դուրս գանք՝ անենք, հերիք եղավ խոսենք։ Քաղաքական պատասխանատվություն չի կրելու իշխանությունը, չկա նման բան, կա երկիրը քանդելու ծրագիր, ու լավ էլ իրագործում են»,- MediaHub-ի հետ զրույցում նշեց նա։ 

Նկատում է՝ իշխանությունները երկիրը կքանդեն այնքան, մինչեւ նրանց դեմն առնող կհայտնվի.

«Իրենց ծրագրերն իրագործելու են այնքան ժամանակ, մինչեւ մենք սթափվենք, դուրս գանք փողոց։ Ինչպե՞ս մեկնաբանեմ, թե ինչ վիճակում ենք, ի՞նչ խոսք ասեմ, երբ մեզանում խոսքի պակաս չկա, խոսքի ավելցուկ կա։ Գործողություն արա, դրոշը ձեռքդ դուրս արի՝ անմիջապես հետեւդ կկանգնեմ, խոսելն անիմաստ ա»,-նշում է Խանջյանը։ 

Ասում է՝ 4 տարի է նույն բանն են ասում, բան չի փոխվում․ 

«Ես, ուրեմն, իմ խոսքը չպիտի հարգեմ, որ անընդատ խոսեմ։ Խոսում, խոսում են, ի՞նչ օգուտ դրանից, խոսքի արժեքը դարձել է փալաս»։

Խանջյանն անտրամաբանական է համարում ընդդիմության գործողություններն էլ՝ գործի կեսից այլ ուղղությամբ են գնում։

«Դիմադրության» շարժումը դեռեւս անցած տարվա ապրիլից «Հայաստան ոտքի», «Արցախ ոտքի», «Զարթնի՜ր Լաո», «Առանց Նիկոլ Հայաստան» կարգախոսերով դուրս եկավ փողոց՝ իշխանության հրաժարականի պահանջով, բայց չհաջողեց։ 

«Կա՞ ընդդիմություն, մեկը, որ կարող է առաջնորդել. «բրախել» են։ Էն մարդիկ քանդում են, մենք էլ անընդհատ խոսում ենք, մենակ խոսել գիտենք, ուրիշ ոչ մի բան։ Ի՞նչ անեմ՝ ես վեր կենա՞մ, 73 տարեկան եմ։ Լավ, վեր կենամ, ավտոմատ տան ձեռքս՝ գնամ։ Բայց դրանից օգուտ լինելո՞ւ է։ Միթե՞ չկա մի կարգին մարդ էս երկրում, որ երկրի մասին մտածի, ոչ թե իր անձի։ Անընդհատ մի բան կազմակերպում են, հանում են դուրս, ասում են՝ էս վերջինն ա, մինչեւ վերջ գնալու ենք։ Հետեւներից գնում ենք, գոռգոռում են, հետո պարզվում է՝ իրենց վերջը լրիվ ուրիշ վերջ ա, վերջ չկա, շրջանցել են, մտել են ուրիշ տեղ։ Հետո՞, որքան կարելի է»,-ստեղծված փակուղային իրավիճակի վերաբերյալ իր վրդովմունքը հայտնեց մտավորականը։ 

Գուրգեն Խանջյանը չցանկացավ ավելին խոսել, զայրացած էր ավելի շատ ոչինչ չանող ընդդիմության վրա։ 

«Էնքան խելոք մարդիկ ունենք, որ խոսում են, լսողն ո՞վ է»,-եզրափակեց նա։ 

Լիա Սարգսյան