Ուկրաինայի նախագահ Վոլոդիմիր Զելենսկին հայտարարել է, որ պատրաստվում է Միացյալ Նահանգներին ներկայացնել ծրագիր այն մասին, թե ինչպես է մտադիր ավարտել Ռուսաստանի հետ պատերազմը։ Այս մասին նա խոսել է «Ուկրաինա 2024: Անկախություն» ֆորումի շրջանակներում անցկացված մամուլի ասուլիսի ժամանակ։
Զելենսկին պատրաստվում է պատերազմը դադարեցնելու մասին ծրագիրը ներկայացնել թե՛ ԱՄՆ նախագահ Ջո Բայդենին, թե՛ նախագահի թեկնածուներ Քամալա Հարրիսին ու Դոնալդ Թրամփին։
Նա նշել է, որ ուկրաինական ուժերի ներխուժումը Կուրսկի մարզ այդ ծրագրի փուլերից մեկն է, և որ իր ծրագիրը ներառում է նաև լրացուցիչ քայլեր դիվանագիտական և տնտեսական ճակատում, այդ թվում՝ խոշոր փաթեթ, որը «կստիպի Ռուսաստանին պատերազմն ավարտել դիվանագիտական ճանապարհով»։
Զելենսկին ընդգծել է, որ Կուրսկի մարզում գործողության շնորհիվ Ուկրաինան կանխել է «Խարկովի, Սումիի և Չեռնիգովի մարզերի օկուպացման վտանգը», և որ «շատ քիչ մարդիկ գիտեին այդ գործողության մասին»։