Ալեն Սիմոնյանն իր օգնականի և ԱԺ աշխատակազմի ղեկավարի հետ մեկնելու է Կատար, բայց գրված չէ՝ ինչի՞ համար. գնում է ֆուտբոլ նայելու։
Նման բաները իրենց դուր են գալիս, բայց մեդալի մյուս կողմ էլ կա՝ պատասխանատվությունը, որն այդպես էլ այս իշխանությունները չսովորեցին։ Այս մասին մամուլի ասուլիսի ժամանակ ասաց քաղտեխնոլոգ Կարեն Քոչարյանը։
«Գալու է պահ, երբ իրենցից սկսելու են բավականին կոշտ պահանջել: Օրինակ՝ երեկ Քարվաճառի բնակիչներն էին պահանջում, քանի որ պետք է իրենց տներ տան։ Այդ մարդիկ կանգնած են խնդրի առջև»,-ասաց Քոչարյանը։
Նա անդրադարձավ նաև նոյեմբերի 23-ին Երևանում տեղի ունեցած ՀԱՊԿ գագաթնաժողովին, ասելով, որ այս դեպքում բացարձակապես հավատում է իշխանության հայտարարությանը, մասնավորապես՝ Ալեն Սիմոնյանի այն խոսքին, որ չստորագրեցին, որովհետև այնտեղ քաղաքական հայտարարություն չկար և Ադրբեջանի վերաբերմունք՝ ևս։
«Կարծում եմ, որ Սոչիից հետո խոստացվել է, որ ՀԱՊԿ-ն ինչ-որ հայտարարություն կընդունի, բնականաբար՝ Ռուսաստանի կողմից, որովհետեև ՀԱՊԿ չկա, դա փաստացի ինձ համար կլուբ է, որտեղ տղեքն են հավաքվում, բայց ոչ մի ռեալ, կենսունակ գործունեություն չկա»,-ընդգծեց քաղտեխնոլոգը։
Վերջինս ՀԱՊԿ-ի միակ կենսունակությունը համարում է Ղազախստանին ցուցաբերած օգնությունը, որը ներքաղաքական խնդիր է եղել, մինչդեռ ՀԱՊԿ-ը ներքաղաքական խնդիրներ լուծելու համար չէ, որ ստեղծվել է:
Շուշանիկ Միսկարյան