Արցախի նորանշանակ պետնախարար Ռուբեն Վարդանյանը, ով դարձել է ԼՂՀ իշխանության հիմնական «փայատերը», մտադիր է գրեթե ամբողջությամբ փոխել կառավարության կազմը:
Մինչ Վարդանյանը խոստանում է ոչ ստանդարտ լուծումներ, արդեն իսկ որոշակի ինտրիգներ են հասունանում:
Մասնավորապես, տարածքային կառավարման նախարարի պաշտոնը թողնելու է Հայկ Խանումյանը, ով Ստեփանակերտում համարվում էր Նիկոլ Փաշինյանի «աչքն ու ականջը»: Սա ենթադրում է, որ նոր կառավարության նկատմամբ պաշտոնական Երևանի ազդեցությունը սահմանափակ է լինելու:
Եվս մեկ տեղեկատվություն հաստատում է այս միտումը:
ՀՀ արտաքին գործերի նախկին նախարար Վարդան Օսկանյանը կնշանակվի Արցախի ԱԳ նախարար: Այս մասին հայտնում են MediaHub-ի արցախյան աղբյուրները: Իհարկե, մեր աղբյուրները չեն բացառում նաև, որ այս պաշտոնում կարող է նշանակվել նաև Հայաստանի մեկ այլ արտգործնախարար՝ Արա Այվազյանը: Ավելորդ է ասել, որ երկու դիվանագետներն էլ լարված հարաբերություններ ունեն Նիկոլ Փաշինյանի հետ՝ չնայած այն հանգամանքին, որ Այվազյանը մի քանի ամիս պաշտոնավարել է հենց Փաշինյանի կաբինետում:
Միևնույն ժամանակ, Արցախում նոմինալ իշխանությունը պահպանած Արայիկ Հարությունյանը որոշել է չեղարկել սահմանադրական փոփոխությունների գերծընթացը:
«Մինչև այսօր համարում եմ, որ Սահմանադրության մի հոդվածով իմ առաջարկած փոփոխությունն ամենաճիշտ տարբերակն է, բայց նաև երկրի ներքին կայունությունն ավելի կարևոր եմ համարում, քան սահմանադրական փոփոխությունը: Այսօր այդ փոփոխության կարիքը, բարեբախտաբար, չկա, քանի որ այդ լիազորություններն ամբողջությամբ կենտրոնացված չեն նախագահի ձեռքում: Իհարկե, նախագահի կողմից է այդ լիազորություններով օժտվել պետնախարարը, բայց գոնե բոլոր այն մտահոգությունները, որ կար նախկինում, այսօր ֆունկցիաների բաժանման արդյունքում, կարծես, լուծվել են: Դրա համար սահմանադրական փոփոխության հարցում մենք շտապելու որևէ անհրաժեշտություն չունենք»,-ասել է նախագահ Հարությունյանը՝ պատճառաբանելով իր որոշումը:
Արայիկ Հարությունյանի բերած պատճառաբանությունն անկեղծորեն հիասթափեցնող է: Ոչ մի կանխակալ կարծիք չունենք Ռուբեն Վարդանյանի անձի հանդեպ, բայց չի կարելի կարծիք ձևավորել, թե նրա անձը բարձր է ինստիտուցիոնալ փոփոխություններից: Հենց դա է, ըստ էության, ասել Հարությունյանը՝ կարծիք ձևավորելով, որ սահմանադրական փոփոխությունների գործընթացն իմիտացիոն է եղել:
Վահրամ Բագրատյան