Թբիլիսիում օտարերկրյա գործակալների մասին օրինագծի դեմ ցույցն ավարտվել է, Վրաստանի մայրաքաղաքի կենտրոնում՝ Ռուսթավելիի պողոտայի երթեւեկությունը վերականգնվել է։ Հանրահավաքը ոստիկանությունը ցրել է գիշերը ուժի կիրառմամբ, մասնակիցների բերման ենթարկելով։
Հայտնի է առնվազն 6 ձերբակալվածների մասին, որոնց թվում է ընդդիմադիր «Ավելի շատ ազատություն» կուսակցության առաջնորդ Զուրաբ Ջափարիձեն։
Վրաստանում անկարգությունները, ինչպես ԱՄՆ-ում, մեկնաբանել են նաև ԵՄ-ում. Եվրոպական դիվանագիտության ղեկավար Ժոզեպ Բորելը հայտարարել է, որ Օտարերկրյա գործակալների մասին օրենքը (գրեթե ամբողջությամբ «արտագրված» ամերիկյանից), որը բողոքի ցույցեր է առաջացրել Թբիլիսիում, անհամատեղելի է ԵՄ արժեքների հետ և հակասում է Եվրամիությանն անդամակցելու Վրաստանի նպատակին։
Վրաստանի նախագահ Սալոմե Զուրաբիշվիլին ուղերձ է հրապարակել, որտեղ ասված է, որ ժամեր առաջ ընդունված օրենքը ոչ մեկին պետք չէ, բացի Մոսկվայից, գրում է «Aliq.ge-ն։
Նրա խոսքով` այդ օրենքը պետք է չեղյալ համարվի և չպետք է ուղարկվի Վենետիկի հանձնաժողով։
Զուրաբիշվիլիի խոսքով` Ռուսթավելիի պողոտայում հավաքված քաղաքացիները ներկայացնում են ազատ Վրաստանը։
«Ես դիմում եմ ձեզ, նրանց, ովքեր կանգնած են Ռուսթավելիի պողոտայում։ Ես կանգնած եմ այստեղ՝ Նյու Յորքում, իսկ թիկունքիս Ազատության արձանն է։ Սա այն խորհրդանիշն է, որի համար Վրաստանը միշտ պայքարել է։ Ես ձեր կողքին եմ։ Այսօր դուք ներկայացնում եք ազատ Վրաստանը։
Վրաստանը, որն իր ապագան տեսնում է Եվրոպայում և ոչ մեկին թույլ չի տա խլել այդ ապագան։ Այդ ապագան պատկանում է մեր հաջորդ սերնդին»,- ասել է նախագահը։
Նախագահը հավելել է, որ Վենետիկի հանձնաժողովը շատ լավ գիտի, թե դա ինչպիսի օրենք է։ Զուրաբիշվիլին նաև վերահաստատել է իր վետո դնելու խոստումը։
Ավելի վաղ նախագահի աշխատակազմից հայտնել էին, որ Սալոմե Զուրաբիշվիլին չեղյալ է հայտարարել ՄԱԿ-ում պլանավորված բոլոր հանդիպումները։