Չեմ կարող ասել՝ ինչպես են որոշել, որ ես քրեական աշխարհի հետ կապ ունեմ։ Այս մասին այսօր MediaHub.am-ի հետ զրույցում ասաց «Քաղաքացիական պայմանագիր» խմբակցության պատգամավոր Դավիթ Դանիելյանը՝ խոսելով մամուլում տարածվող այն տեղեկությունների մասին, թե վերջինս սերտ կապեր ունի քրեական աշխարհի ներկայացուցիչների հետ։
Նշենք, որ ըստ մամուլի՝ այս խոսակցությունները սկսել են շրջանառվել պատգամավորի հոր մահվան տարելիցից հետո, երբ արարողությանը մասնակցել է նաև Նորտուսցի Ալիկ անունով հայտնի Ալիկ Բանդուրյանը։
«Նորատուսցի Ալիկն ինձ շատ մտերիմ մարդ է։ Ես չգիտեմ, թե ովքեր են համարվում քրեական աշխարհից, որ ասեմ՝ ովքեր են եղել արարողությանը։ Շատ մարդիկ են եղել՝ ոստիկաններ, պատգամավորներ, ես, բնականաբար, չեմ կարող հիշել, թե այդ օրը ովքեր են եկել, գնացել։ Իհարկե, սա շահարկման թեմա չէր, չեմ հասկանում, թե ինչո՞ւ է խոսվում այս մասին»,-ասաց նա։
Պատգամավորն ընդգծեց, որ ավելի կարևոր հարցեր կան մեր երկրում, որոնց անդրադառնալն ավելի նպատակահարմար ու օրակարգային է։
Լիաննա Թորոսյան