Թե ինչ է անում Քյարամյանն ու ինչ նպատակով, պետք է հենց նրան հարցնել։ Ես միայն ծանոթ եմ այն խոսակցություններին, որոնք մամուլում ևս շրջանառվում են։ Այս մասին այսօր MediaHub.am-ի հետ զրույցում ասաց փաստաբան Տիգրան Աթանեսյանը՝ խոսելով Հանրապետական կուսակցության փոխնախագահ Արմեն Աշոտյանին ձերբակալելու խոսակցությունների մասին։
Հիշեցնենք, որ շաբաթ օրը Միասնության հանրահավաքից հետո Արմեն Աշոտյանը ՖԲ ուղիղ եթերում հայտարարեց, որ իշխանությունները ՀՀ Քննչական կոմիտեի նախագահ Արգիշտի Քյարամյանի ձեռքով որոշել են նորից անդրադառնալ չորս տարվա վաղեմության մի գործի, որի շրջանակներում տարբեր մարդկանց են հարցաքննել, սակայն ապարդյուն: Վերջինս շեշտեց՝ Քյարամյանը Նիկոլ Փաշինյանի ուղիղ հրահանգով է հանձն առել այս գործը խելքի բերել:
«Մի քանի շաբաթ առաջ է այդ գործը փոխանցվել ՔԿ-ին, տխրահռչակ Քյարամյանին և Նիկոլ Փաշինյանը հանձնարարել է, վստահաբար եմ դա ասում, ամեն կերպ կալանավորել ինձ»,- ասել էր Աշոտյանը:
«Տեղի ունեցողը, բնականաբար, իրավաբանության հետ որևէ աղերս չունի․ հնարավոր է՝ «մասկի շոու անեն», ձերբակալեն։ Մարդիկ պարզապես ուզում են ինքնահաստատվել, ինչը չեն արել պատանի տարիներին, հիմա փորձում են բացը լրացնել։ Ոստիկանությանն այստեղ-այնտեղ ուղարկելով սիրում են ինքնահաստատվել։ Ծանուցագիր կամ նման այլ բան չի եղել»,-ասաց փաստաբան Աթանեսյանը։
Ի դեպ, երեկ լուրեր էին շրջանառվում, որ իշխանությունները որոշել են Աշոտյանին բերման ենթարկել վերջինիս Արցախից վերադառնալիս, ինչը տեղի կունենա այսօր: Գործն արդեն միս ու արյուն է ստանում. ՀՀ Գլխավոր դատախազության այսօրվա հաղորդագրոթյան համաձայն՝ Միքայել Նարիմանյանը, հանդիսանալով «Երևանի Մխիթար Հերացու անվան պետական բժշկական համալսարան» հիմնադրամի նախկին ռեկտորը, ինչպես անձամբ, այնպես էլ նույն հիմնադրամի կողմից ստեղծված «Հերացի» արհեստակցական կազմակերպության նախագահ Մ.Ս.-ի օժանդակությամբ, դիտավորությամբ, վատնման եղանակով, ծառայողական դիրքն օգտագործելով, կատարել է իրեն վստահված, իր տնօրինմանը հանձնված Հիմնադրամին պատկանող առանձնապես խոշոր չափերով գույքի հափշտակություն՝ 39 մլն 660 հազար դրամի չափով:
Մասնավորապես, Մ.Ն.-ն պայմանավորվածություն է ձեռք բերել Մ.Ս.-ի հետ՝ հիմնադրամի գումարները «Հերացի» կազմակերպությանը փոխանցելու, այդ գումարներով հիմնադրամի հոգաբարձուների խորհրդի նախագահի հետ առնչություն ունեցող «Նավասար» ՍՊ ընկերության «Ծովասար» հյուրանոցային համալիրի տնօրեն Վ.Ս.-ից շուկայականից բարձր գներով հանգստի տներ ձեռք բերելու և ավելի վճարվելիք գումարները Վ.Ս.-ին դարձնելու շուրջ: Վերոնշյալ արարքի կատարման համար Գլխավոր դատախազությունը Մ.Ն.-ի նկատմամբ քրեական հետապնդում է հարուցել: Նշենք, որ Աշոտյանն այդ տարիներին եղել է հոգաբարձուների խորհրդի նախագահը և գործով մեղադրական սլաքները փորձ է արվում ուղղել նաև նրա կողմ։
Լիաննա Թորոսյան