Այսօր ահազանգի կոչնակը հնչեցնելու հերթական պահն է, որը պետք է միասին անենք: Ուրեմն դիմում եմ միջազգային հանրության բոլոր դերակատարներին. մարդու իրավունքնե՞ր եք ասում, ուրեմն ասեք, ես ինչպես նայեմ այն մայրերի աչքերին, որոնց օրվա ամենամեծ երազանքը իրենց երեխաների համար մի բուռ միրգ, սնունդ գտնելն է, ես ինչպես նայեմ հղի կանանց աչքերին, որոնց երեխաները թերսնված ծնվելու վտանգի առաջ են, ես ինչպես նայեմ այն մարդկանց աչքերին, որոնք հերթերի մեջ են շաքարավազ կամ ձեթ ստանալու համար: Այս մասին Ստեփանակերտի Վերածննդի հրապարակում հանրահավաքի ժամանակ հայտարարեց Արցախի ՄԻՊ Գեղամ Ստեփանյանը:
«Ես ինչպես նայեմ այս հողակտորի համար իր ամենաթանկը տված՝ զոհվածի մոր աչքերին, որը ահաբեկված է և վախենում է, որ կկորցնի իր վերջին սրբությունը՝ զավակի գերեզմանը: Ես ուզում եմ, որ դուք պատասխանեք նրանց, որովհետև ես այլևս բառեր չեմ գտնում»,- հայտարարեց նա:
«Գեղեցիկ և շքեղ դահլիճներում մարդու իրավունքներից խոսելը մի բան է, այդ ամենը գործնական քայլերով ապացուցելը՝ մեկ այլ: Մտահոգված ենք, խիստ մտահոգված ենք, կոչ ենք անում և նմանատիպ այլ հայտարարություններ. բա՛վ է, հերի՛ք է: Մինչ դուք մերկապարանոց հայտարարություններ եք անում, 120 000 մարդ է մահանում»,- հայտարարեց նա:
Գեղամ Ստեփանյանը դիմեց նաև ռուս խաղաղապահներին՝ տեր կանգնեք ձեր մանդատին, ապահովեք արցախահայության անվտանգությունը, որը ստանձնել եք:
Մանրամասները՝ տեսանյութում